BNA-dan koronavirusla bağlı AÇIQLAMA

Xəbər verdiyimiz kimi Çinin Vuhan şəhərindən başlayan yeni koronavirus dünyanın bir çox ölkəsində yayılmağa davam edir. Artıq bir neçə gündür ki, KİV-də Azərbaycanla qonşu olan İran İslam Respublikasında da koronavirusun sürətlə yayıldığı məlumatları qeyd olunub. Azərbaycan ilə İran arasında gediş-gəlişin çox olduğunu və buna görə də koronavirusun ölkəmizə gəlmə ehtimalını nəzərə alaraq, əhalinin gündəlik olaraq ən çox istifadə etdiyi nəqliyyat vasitələrindən olan avtobusların virusdan qorunma vəziyyəti ilə bağlı Bakı Nəqliyyat Agentliyinin mətbuat xidmətinin rəhbəri Mais Ağayev ilə əlaqə saxladıq.

Mais Ağayev Sonxeber.az-a açıqlamasında bildirib ki, ümumilikdə kəskin respirator infeksion xəstəliklərin yayılmasına qarşı qabaqlayıcı tədbirlərə hələ havalar soyumağa başlayandan start verilib:
"Oktyabr, noyabyr aylarından başlayaraq, Bakı Nəqliyyat Agentliyi Koroğlu Nəqliyyat Mübadilə Mərkəzində dezinfeksiya işləri aparır. İşlər hər həftənin şənbə günü gecə saatlarında həyata keçirilir ki, bunun da əsasə məqsədi sərnişinləri narahat etməməkdir. Perronlar, gözləmə zalları və park ərazisi xüsusi dərman məhlullarından istifadə olunmaqla dezinfeksiya edilir.
Avtobuslara gəlincə bildirim ki, Nazirlər Kabinetinin müvafiq qərarına əsasən gündəlik olaraq avtobuslar xətdən qayıtdıqdan sonra istehsalat bazasında təmizlənməlidir. Həmçinin, hər bir daşıyıcı mütləq şəkildə iki aydan bir avtobusların ümumi dezinfeksiyasını təşkil etməlidir.
Əgər müvafiq səhiyyə qurumunun tövsiyəsi olarsa, bu halda həm avtobuslarda, həm də Koroğlu Nəqliyyat Mübadilə Mərkəzində əlavə dezinfeksiya işləri görülə bilər".

Fəridə Ağazadə

Telegramda izləyin

instagramda izləyin