"Suriyada yeni mərhələ başlayır"-Politoloq türk əsgərlərinin şəhid olmasından DANIŞDI
Xəbər verdiyimiz kimi Suriya rejimi tərəfindən İdlibdə Türk Silahlı Qüvvələrinə qarşı törədilmiş hava hücumu nəticəsində şəhid olan türk əsgərlərinin sayı 33-ə çatıb.
Bu barədə politoloq Məhəmməd Əsədullazadə Sonxeber.az-a Suriyada olan ən son vəziyyəti şərh edib. O, bildirib ki, Suriyada Türkiyə və Rusiyanın ortaq strateji əməkdaşlığı taktiki idi:
"İki ölkə arasında Astana və Soçi razılaşması Moskva tərəfindən pozulmuş oldu. Rusiya ABŞ -Türkiyə əlaqələrinin pozulması üçün bu günə kimi kifayət qədər çalışdı amma sonda meydanda Ankaranı tək buraxaraq Suriyadan çıxarmaq planını reallaşdırmaq üçün xeyli işlər gördü. İndi də İdlibdə bunu reallaşdırmağa çalışır.
Qeyd edim ki, ABŞ və İsrail yalnız Əsədə zərbələr endirməklə Türkiyəni bu meydanda tək buraxmayacaq. Artıq Türkiyə əvvəlki siyasətinə qaytımaq kursunu götürərək ənənəvi müttəfiqlərinə geri dönəcək.
Tarix boyu Rusiya-Türkiyə strateji ortaqlaqlığı mümkün olmayıb və baş verənlər bunun bariz nümunəsidir. Çünki Rusiya Türkiyəni öz imperiya maraqlarına və geosiyasətinə təhdid görür. İki ölkə Qara Dənizdə, Cənubi Qafqazda, Yaxın və Orta Şərqdə rəqibdirlər".
Politoloq Ankaranın Rusiya ilə iqtisadi və enerji əlaqələrini zəiflədəcəyini və Moskvadan asılılığını ləğv etməyə çalışacağını deyib:
Bu müddət ərzində prezident R.T.Ərdoğan kifayət qədər Türkiyəni Rusiyaya yaxınlaşırdı. Amma Rusiya Türkiyənin Liviyada və Suriyada heç bir maraq və təhlükəsizliyini nəzərə almadı. Ankara baş verənlərdən nəticə çıxaracaq və Rusiyanın bu siyasətini Suriyada cavabsız qoymayacaq.
Politoloq Rusiyanın İdlibdə M4 və M5 strateji marşutu ələ keçirməyə və İdlibdən Türkiyəni çıxarmağa çalışdığını bildirib:
"Tərəflər arasında diplomatik danışıqlar nəticəsiz bitir. Dünən Ankarada Rusiya heyəti ilə danışıqlar baş tutmadı və ardınca Rusiya Əsədin əli ilə Türkiyə hərbiçilərinə geniş hücum etdi. Həmçinin Putin çalışır ki, Ərdoğanla görüşədək bu magistral yollara nəzarəti ələ alsın və İdlibdə güclü mövqeyə sahiblənsin. Nəticədə masada Türkiyəni güzəştlərə məcbur etsin.
Ümumiyyətlə Əsəd Rusiyanın icazəsi olmadan belə bir hücuma risk etməzdi və İŞİD tərəfindən darmadağın edilən ordusunda bu kimi silahlar və güclü heyəti yoxdur.
Rusiya düşünür ki, bu hücumlar qarşısında Ankara geri çəkiləcək. Amma Türkiyə daha da irəli gedəcək. Suriyada yeni mərhələ başlayır və Rusiya-Türkiyə ortaq koordinasiyası sona çatdı. Yerini ABŞ və Türkiyə əməkdaşlığına verdi. Suriyada İsrail, ABŞ və Türkiyə ortaq əməliyyatlar keçirib, Rusiyaya ciddi problemlər yaradacaqlar.
Göründüyü kimi Rusiya Türkiyə əməkdaşlığı mövsümidir və tərəflərin birgə maraqları tarix boyu davamlı şəkildə ortaq olmayıb.
Liviyada, Qara Dənizdə və Suriyada Rusiya Türkiyə əməkdaşlığı mümkün deyil və Ankara öz müttəfiqlərinin dəstəyini almayınca Rusiya Ankaranın üzərinə gedəcək.
Regionda vəziyyət mürəkkəbləşir. Proses Əsədin devrilməsi ilə bitə bilər. Artıq Əsədə qarşı terrorçu qruplar deyil, eyni zamanda böyük dövlətlərin orduları hücuma keçə bilər. Rusiya Əsədə görə ABŞ, Türkiyə və İsrailə qarşı gələ bilməyəcək.
Onu da qeyd edim ki, Rusiya və İran min kilometrlərlə məsafədən gəlib Suriyada nə gəzirsə, Türkiyə öz mənəvi sərhədləri daxilində öz təhlükəsizliyini qoruyur və Suriyada kənar güc deyil".
Fəridə Ağazadə
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş