"Əgər toqquşmalar dayanmasa, Türkiyə Rusiya üçün boğazları bağlaya bilər"-RƏY

Türkiyə Suriyanın İdlib bölgəsində vəziyyətin gərginləşməsi ilə əlaqədar İstanbul (Bosfor) və Çanaqqala (Dardanel) boğazlarını hərbi gəmilər üçün bağlamaq imkanını nəzərdən keçirir.
Bu barədə Türkiyə KİV-ləri məlumat yayıb.
Bundan əlavə, Türkiyə Rusiya "S-400" sistemlərinin ölkə ərazisində yerləşdirilməsini də təxirə sala bilər.

Bu barədə Sonxeber.az-a politoloq Elxan Şahinoğlu açıqlama verib. O, bildirib ki, Montrö anlaşmasına görə Türkiyənin tam haqqı var ki, müharibə şəraitində boğazlardan istənilən ölkənin gəmiləri üçün keçidi dayandırsın:
"Amma inanmıram ki, Türkiyə tezliklə bu addımı atsın. Düzdür, Rusiya təxribatla məşğuldur. O da hərbi gəmilərini Suriya istiqamətində keçirməyə çalışır. Ona görə indi əsas addımı Rusiya atmalıdır. İdlib ətrafında atəşkəsə riayət olunsa, Türkiyə hücumları dayandıracaq. Amma indiki vəziyyətdə Türkiyə sonadək getməyə hazırdır. Çünki, 30 dan çox şəhidi var və vəziyyət də getdikcə gərginləşir.
Əgər toqquşmalar dayanmasa, Rusiya Əsəd rejiminə dəstəyi davam etsə Türkiyə məcbur qalıb Rusiya hərbi gəmiləri üçün boğazları bağlaya bilər".

Fəridə Ağazadə

Telegramda izləyin

instagramda izləyin