"Azərbaycanın qızıl valyuta ehtiyatı nağd pul kütləsindən çoxdur, devalvasiyadan söhbət gedə bilməz"-RƏY

Dünyada baş verən proseslər dollardan da yan keçməyib. Belə ki, Azərbaycanda bir ABŞ dollarının məzənnəsi 1,7000 manat olub. Həmçinin dolların qalxması ilə əhali banklara axın etməyə başlayıb. Bu vəziyyət nə vaxta kimi davam edəcək və Azərbaycan iqtisadiyyatına hansı təsirləri var?

Bu barədə iqtisadçı-ekspert Elşad Məmmədov Sonxeber.az-a danışıb. O, bildirib ki, məsələyə iki aspektdən yanaşmağı düzgün hesab edir. Bu yanaşmalar qısa və uzunmüddətli olmaqla fərqlidir:

"Qısamüddətli baxış-nöqteyi nəzərdən yaxın həftələrdə, aylarda dollarla bağlı olan ajiotajın yaranmasına, inkişafına heç bir ehtiyac qalmayacaq. Çünki nəzərə almaq lazımdır ki, bizim iqtisadi potensialımız, iqtisadi rezervlərimiz var. Eyni zamanda bir gün ərzində dolların bazarda bahalaşması Azərbaycanın makro göstəricilərinə qısa müddət ərzində heç bir təsir göstərə bilməz. Bu məsələ onu deməyə əsas verir ki, bu psixoloji bir ajiotajdır və dollar ətrafında olan bu vahiməli proseslər, psixoloji amillərin olması əhalinin bank sektoruna inamının az olmasının göstəricisidir. Burada böyük məsuliyyət və problemlər bank sektorunda və onun idarə edilməsindədir. Əgər əhalidə Mərkəzi Bankın rəhbərinə lazımı səviyyədə etimad olsaydı, düşünürəm ki, Mərkəzi Bankın rəhbərliyinin bir bəyanatı ilə tam şəkildə bu problemin qarşısı alına bilərdi. Azərbaycanın qızıl valyuta ehtiyatları Azərbaycandakı nağd pul kütləsindən 5 dəfə çoxdur. Belə olan halda hansı devalivasiyadan söhbət gedə bilər?"

Ekspert vurğulayıb ki, bu qısamüddətli baxışdır:

"Uzun müddətli nöqteyi nəzərdən baxsaq, doğurdan da bank sektorunda ciddi şəkildə iqtisadi siyasət dəyişdirilməlidir. Əgər bu baş verməsə və Mərkəzi Bank valyuta siyasətinə, kapital hərəkətinə nəzarət etməsə, valyuta möhtəkirliyi ilə məşğul olan insanların fəaliyyətini məhdudlaşdırmasa, o zaman heç bir iqtisadi potensial, iqtisadi rezervlər bizim milli iqtisadiyyatımıza yardım etməyəcək və uzun müddətli perspektivə baxanda ciddi problemlər yarana bilər. Ona görə də yaxın aylarda valyuta bazarında hansısa problemlərin olacağını gözləmirəm. Amma bank sektorunda ciddi dəyişikliklər etmək lazımdır".

Fəridə Ağazadə

Telegramda izləyin

instagramda izləyin