Hacı Şahin: "İnsan özünə və digərlərinə təhlükə yaradırsa, Allah dərgahında qatil hesab olunur"

Məlumdur ki, koronavirus epidemiyası bütün dünyada insan itkisinə yol açır. Bir çox insanlar isə bu virusdan qorunmaq üçün "Allah mənə nə qədər ömür yazıbsa, yaşayacam" deməklə qoruyucu vasitələrdən imtina edir, heç bir tibbi tədbirə əməl etmirlər.

Sonxeber.az xəbər verir ki, bu kimi suallara İctimai kanalın qonağı olan Qafqaz Müsəlmanları İdarəsinin (QMİ) nümayəndəsi, tanınmış ilahiyyatçı Hacı Şahin Həsənli aydınlıq gətirib:

"Dinimiz insanı məsuliyyətli bir varlıq olaraq təqdim edir. İnsan öz sağlamlığına görə Allah qarşısında məsuliyyət daşıyır. Can bizə verilən bir əmanətdir. "Qurani-Kərim" də açıq şəkildə qeyd olunur ki, öz əlinizlə özünüzü təhlükəyə atmayın. Bəzi insanlar deyir ki, Allah məni qoruyar, ölüm nə vaxt gələcəksə gələcək. Bu tamamilə yalnış yanaşmadır. Çünki insan alın yazısına məhkum bir varlıq deyil. İnsan öz davranışları nəticəsində müəyyən cəzalara məhkum olur. Yəni, insan yanlış davranarsa, özünü oda atıb, Allah məni qoruyar deyəcəksə, təbii ki, bu belə olmayacaq. İnsan özünə və digərlərinə təhlükə yaradırsa, demək olar ki, bu insan Allah dərgahında qatil hesab olunur. Kimsə kiminsə bilərəkdən ölümünə səbəb olursa, günahkar, bais hesab olunur. Ona görə də dinimizin tələbinə də uyğun olaraq ehtimal olunan təhlükədən hər kəs qorunmalıdır. Əgər qorunmursa, həmin insan həm cəmiyyət, həm qanun, həm də Allah qarşısında məsuliyyət daşıyır".

Şəlalə Babayeva

Telegramda izləyin

instagramda izləyin