"Dünyada sanksiyaların aradan qaldırılması bu dövrdə olduqca zəruridir"-RƏY

Koronavirus pandemiyası bütün dünyada bir çox sahələri "vurdu". Turizm, hava nəqliyyatı, sərnişin daşıma və xidmət sahələri ağır zərbə aldı. Hətta film, eləcə də incəsənət sahələri, idman yarışları kimi bahalı və gəlirli sahələr dayandı.
Azərbaycanda da hökumət ən çox mənfi təsirə məruz qalan turizm, hotelçilik, ictimai iaşə, əyləncə, nəqliyyat, ticarət və s. kimi ümumilikdə təxminən 12 fəaliyyət sahəsi müəyyən edib.
Karantin və xəstəlik dövründə zərərə məruz qalan şirkətlərin Azərbaycan iqtisadiyyatındakı yeri, qadağaların ümumi iqtisadi inkişafa təsirinin həcmini təqdim etməkdir.
Koronavirus pandemiyası şəraitində dünya siyasətində, dövlətlərarası münasibətlərdə sanksiyaların götürülməsi məsələsi olduqca aktual xarakter daşıyır. Belə ki, pandemiyanın ən iri ocaqlarından biri olan İranda bu ölkəyə qarşı tədbiq edilən sanksiyaların acınacaqlı təsiri göz qabağındadır. İqtisadi durumu xeyli çətinləşdirən sanksiyalar koronavirusa qarşı mübarizəyə ciddi zərbə vurmaqla ölüm hallarının çoxalmasına səbəb olur.

Məsələ ilə bağlı iqtisadçı-ekspert Elşad Məmmədov Sonxeber.az-a açıqlama verib. O, bildirib ki, hazırda dünya iqtisadiyyatının bu vəziyyətində sanksiyaların aradan qaldırılması olduqca zəruridir:

"Biz bilirik ki, dünya siyasətində və iqtisadi sferada ikili standartlar nəticəsində müəyyən ölkələrə qarşı sanksiyalar tətbiq olunur. Belə olan halda sözssüz ki, həmin ölkələrin koronavirus pandemiyası ilə bağlı mübarizəsi xeyli dərəcədə çətinləşə bilər. Çünki müasir dünya iqtisadiyyatında istehsal zəncirləri bir-birinə bağlıdır, ölkələr arasında əmək bölgüsü çox dərin şəkildə formalaşıb. Ona görə də əlaqələrin bərpası olduqca vacibdir. Düşünürəm ki, bu dönəmdə sanksiyaların aradan qaldırılması olduqca vacib məsələdir. Dünya iqtisadiyyatındakı problemlərin Azərbaycan iqtisadiyyatından yan keçməyəcəyi də şübhəsizdir. Düşünürəm ki, hökumətin iqtisadi bloku və Mərkəzi Bank təxirəsalınmaz tədbirlər reallaşdırmalıdır. Bu tədbirlər çərçivəsində ilk növbədə bank sektoruna aid məsələlər, pul kredit siyasətinin yumuşaldılması, pul kütləsinin aktiv şəkildə iqtisadiyyata, real sektora daxil olması, valyuta bazarında sabitliyin formalaşması, valyuta məhdudiyyətlərinin tətbiqi, eyni zamanda pul kütləsinin effektiv şəkildə idarə edilməsidir ki, həmin kütlə valyuta bazarına, maliyə sektoruna deyil real iqtisadiyyata və sosial layihələrin reallaşdırılmasına istiqamətlənsin. Digəri isə sosial iqtisadiyyatdır ki, həm kommunal ödənişlər, həm də bütövlükdə əhaliyə maliyə yardımının edilməsi ilə bağlı qərar qəbul olunmalıdır. Əlbəttə ki, vergi islahatları daha da dərinləşməli və vergi istiqamətində stimullaşdırıcı tədbirlərlə vergi tətillərinin tətbiq olunması ilə müəyyən mənada sahibkarlara, işguzar mühitə dəyən maddi zərərin qarşısı alına bilər. Ümumillikdə biz hazırkı vəziyyətdə ölkə iqtisadiyyatında dövlətin rolunun kəskin şəkildə artırılmasına doğru getməliyik və ölkə iqtisadiyyatının idarə etməsi modeli ilk növbədə strateji planlaşdırmaya söykənməlidir"

F.Ağayeva

Telegramda izləyin

instagramda izləyin