"İsrail-Azərbaycan əməkdaşlığı strateji xarakter daşıyır"-RƏY

Azərbaycan və İsrail arasında diplomatik əlaqələr 1992-ci il aprelin 6-da qurulub. Bir il sonra İsrailin Azərbaycanda səfirliyi açılıb.
Hazırda iki ölkə arasında isti münasibətlər mövcuddur. İsraildə Azərbaycandan getmiş əsasən yəhudilərdən ibarət diaspor, Azərbaycanda isə böyük yəhudi icması mövcuddur. İki ölkə arasında ticarət və enerji sahəsində, hərbi sahədə əməkdaşlıq var.

Azərbaycan və İsrail arasında diplomatik əlaqələr bağlı politoloq Məhəmməd Əsədullazadə Sonxeber.az-a danışıb.

Politoloq bildirib ki, İsrail Azərbaycan əməkdaşlığı strateji xarakter daşıyır və iki ölkə arasında əlaqələrin dinamik inkişafının hər keçən gün artdığını görə bilərik:

"Bu gün İsraillə hərbi-texniki, enerji və kənd təsərrüfatı sahəsində əməkdaşlıq yeni dövrün tələblərinə uyğun olaraq hər iki xalqın maraqlarını özündə əks etdirir. Yəhudilərlə Azərbaycan xalqı arasında dostluq və tərəfdaşlıq əlaqələrinin tarixi bizim eradan əvvələ gedib çıxır və bu istiqamətdə geniş danışmaq olar. Hazırda iki ölkə arasında əlaqələrində heç bir problem yoxdur. Bu da o deməkdir ki, iki ölkə strateji siyasətlərini elə bir istiqamətdə qurublar ki, bu üçüncü ölkələrin əleyhinə yönəlməyib. Düzdür, iki ölkənin əməkdaşlığından narahat olan qüvvələr var. Amma Azərbaycan və İsrail öz əlaqələrini digər ölkələrin maraqları konteksində qurmur. İsrail Azərbaycan neftinin əsas tədarükçüsüdür və ölkəmizin müdafiə sənayesinin inkişafına böyük töhfə verir. Məhz rəsmi Bakı və Təl-Əviv arasında əlaqələr müttəfiqlik səviyyəsindədir. Ümid edirəm yeni bir siyasi mərhələdə Azərbaycan İsraildə səfirliyini açacaq. Azərbaycan və Yəhudi xalqları tarixin ən ağır sınaqlarında soyqırıma məruz qalan xalqlardır. İki xalqı birləşdirən tarixi ortaq nöqtələr var. Məhz bu kodla iki ölkə strateji siyasətini qarşılıqlı maraqlar çərçivəsində inkişaf etdirir".

F.Ağayeva

Telegramda izləyin

instagramda izləyin