"Virus bitdikdən sonra ABŞ, Çin və Rusiya arasındakı qarşıdurma davam edəcək"-RƏY

ABŞ Müdafiə Nazirliyi Konqresə Hind və Sakit okeanları bölgəsində Çinin və Rusiyanın artan imkanlarının qarşısını almaq üçün əlavə olaraq 20 milyard dollar ayrılması barədə sorğu göndərdi. Pentaqon ayrılacaq vəsaitin raketdən müdafiə sistemlərinin genişləndirilməsi, radar xəbərdarlıq sistemlərinin yerləşdirilməsi, bölgədə ABŞ-ın müttəfiqi olan ölkələrin hərbi potensialının gücləndirilməsinə istifadə olmasını təklif edir. Pentaqonun sözügedən təklifi Hind və Sakit okeanları bölgəsində ABŞ-ın Rusiya və Çinlə getdikcə daha geniş vüsət alan rəqabətinin göstəricisidir. Bu geosiyasi qarşıdurma nəinki Avrasiya məkanında, ümumiyyətlə dünya miqyasında aparıcı güc mərkəzlərinin formalaşdırdığı strateji mənzərəyə təsir edən başlıca amillərdən biridir.

Bununla bağlı Sonxeber.az-a danışan "Atlas" Araşdırmalar Mərkəzinin rəhbəri, analitik Elxan Şahinoğlu bildirib ki, bəziləri deyirdi ki, koronavirus bitdikdən sonra münasibətlər sistemi böyük ölkələr arasında dəyişəcək: "Müharibələr arxa plana keçir. Nəticə göz qabağındadır. Göründüyü kimi heç nə dəyişməyib. Münasibətlər əvvəlki kimi qalmaqdadır. Silahlanmaya daha çox önəm verilir. Qarşıdurmalar yerində qalır. Hətta Avropa İttifaqı Rusiyaya tədbiq etdiyi sanksiyalardan imtina etməməyə qərar verdi. Bu o deməkdir ki, Amerika, Rusiya və Çin arasında qarşıdurma davam edəcək. Hərbi qüdrətlərini artırmağa çalışacaqlar. Bu ölkələr arasında ciddi rəqabət olacaq. Baxmayaraq ki, bu ölkələr bu gün koronavirusla mübarizədə bir-birinə dəstək verirlər. Bu virus aradan qalxdıqdan sonra rəqabət davam edəcək. Hər üç ölkə silahlanmaya daha çox pul ayıracaq".

Aysel Yusifqızı

Telegramda izləyin

instagramda izləyin