"Azərbaycan iqtisadiyyatı neft gəlirlərindən daha çox gəlir əldə edə bilər"-RƏY

Qlobal enerji böhranının Azərbaycan iqtisadiyyatına mənfi təsirinə baxmayaraq, neft-kimya və metallurgiyanın bir sıra sahələrində artım müşahidə olunur. Beləliklə, 2020-ci ilin ilk rübündə yanacaq istehsalı əhəmiyyətli dərəcədə, karbamid və.s ixracı isə 88,1% artıb. Polad borular, profillər və digər hazır metal məhsulların istehsalı da nəzərəçarpacaq dərəcədə artmışdır.
İxrac tələbi yerli neft-kimya istehsalını nə dərəcədə dəstəkləyəcək?

Mövzu ilə bağlı iqtisadçı-ekspert Akif Nəsirli Sonxeber.az-a açıqlama verib. O, bildirib ki, yerli neft-kimya sənayesi inkişaf etsə də, sözssüz ki, neftdən ötən illərdə gələn gəlirləri kompensasiya edə biləcək gücə malik deyil:

"Amma hər halda başqa yolumuz yoxdur. Biz yerli istehsalın dirçəldilməsi, stimullaşdırılması yolunu tutmalıyıq. Ölkənin daxilində istehsalı artırmalıyıq. Bütün resurslardan istifadə edərək onun sürətlə inkişafına nail olmaq lazımdır. Bura həm neft-kimya sənayesinin, həm də karbomid gübrələrinin çeşidlərinin genişləndirilməsi, kənd təsərrüfatının, yüngül və ağır sənayenin inkişaf etdirilməsi və sairə daxildir.

Çünki qarşıdakı bir-iki ildə ola bilsin ki, neftin qiyməti ümumiyyətlə normal həddə gəlib çatmayacaq və neft erası artıq bitmiş olacaq. Ona görə də biz bu günə qədər neft gəlirlərindən əldə etdiyimiz ehtiyyatları səmərəli şəkildə yerli istehsalın, yəni qeyri-neft sektorunun inkişafına yönəltməliyik. Hesab edirəm ki, o vəsaitlərdən səmərəli istifadə etsək 2-3 ilə Azərbaycan iqtisadiyyatı neftdən gələn gəlirlərdən daha çox gəlir əldə etməyə başlaya bilər. Yəni, tutaq ki, neft bizə hər il 6-7 milyard dollar gəlir gətirirdisə, biz yerli istehsalı inkişaf etdirməklə bir neçə ilə o məbləğin yerini doldura bilərik. Hətta ondan sonrakı illərdə o həddən daha çox gəlir əldə etmək potensialımız var".

F.Ağayeva

Telegramda izləyin

instagramda izləyin