Azərbaycanın yüngül nefti "Azeri Light"ın qiymətində artım gözlənilirmi?-AÇIQLAMA

Mütəxəssislər enerji sektorundakı müsbət tendensiyaları qeyd edirlər.Mayın 6-da aparılan ticarət əməliyyatları zamanı aprelin əvvəlindən bu yana ilk dəfə "Brent" markalı neftin iyul fyuçerslərinin qiyməti 17,9% artaraq 32,06 dollar / barelə yüksəlib. Artım investorların bəzi ölkələrdə karantin planlarının mərhələli şəkildə aradan qaldırılması və OPEK ++ müqaviləsinin həyata keçirilməsinə müsbət reaksiyası ilə əlaqədardır. May-iyun aylarında ABŞ, Norveç, Argentina və Kanadada hasilatın azalması gözlənilir və payızda enerji bazarının fundamental balansının yaxşılaşmasını gözləmək olar.

İyul-avqust müqavilələri üzrə Azərbaycanın yüngül nefti "Azeri Light"ın qiymətinin artımı gözlənilirmi?

Bu barədə iqtisadçı-ekspert Akif Nəsirli Sonxeber.az-a açıqlama verib. O, bildirib ki, yaxın bir neçə ay ərzində hər şey nəzərdə tutulduğu qaydada davam edərsə, pandemiya yox olarsa, bununla yanaşı OPEK ölkələri qəbul etdikləri öhdəlikləri icra etsələr, sözssüz ki, avqust-sentyabr aylarından başlayaraq neftin bir barelinin qiyməti təxminən 40-45 dollara qədər bahalaşa bilər.

Məlumdur ki, dünyada enerji böhranı, enerji resurslarının qiymətinin aşağı düşməsi, bir tərəfdən dünya iqtisadiyyatının dondurulması, digər tərəfdən də hələ ötən il OPEK ölkələri arasında hasilatın azaldılması barədə razılığa gəlinməməsi idi.

Beynəlxalq ekspertlər tərəfindən bu ilin yayında neftin 25 dollara qədər ucuzlaşacağı bildirilirdi. Bu əsasən Rusiya ilə Səudiyə Ərəbistanı arasındakı ortaq məxrəcin tapılmaması ilə bağlı idi. Bunun da üzərinə pandemiya gəldi və neftin qiyməti kəskin aşağı düşdü.

May ayının 19-na birjalarda qədər iyun fyuçerslərinin satışı nəzərdə tutulub. Artıq mayın 19-dan sonra iyul fyuçerslərinə keçəcək. İyul fyuçersləri barədə söylənilən qiymətlər çox güman ki, proqnozlar və yaxud hansısa razılaşmalardır. Real satış iyul ayı üçün hələ yoxdur. Demək istədiyim odur ki, pandemiya sönməyə doğru getsə və OPEK+ ölkələri əldə etdikləri razılaşmaya riayət etsələr təbii ki, dünyada neftin qiyməti bahalaşmağa başlayacaq.

Qeyd edim ki, Azərbaycan nefti birajalarda satılmır. Yəni birbaşa limanlarda satılır. Ona görə də onun qiyməti də birjalara uyğun olaraq dəyişir. Sözssüz ki,əgər neftin qiyməti birjalarda yüksələcəksə, Azərbaycan neftinin də qiyməti ona uyğun olaraq 40 dollar ətrafında qalxacaqdır".

F.Ağayeva

Telegramda izləyin

instagramda izləyin