"Münaqişənin həllində irəliləyişlər yoxdur, toqquşma riski artıb"-RƏY

Mayın 18-də Xarici İşlər naziri Elmar Məmmədyarov ATƏT-in Minsk Qrupunun həmsədrləri və ATƏT-in fəaliyyətdə olan sədrinin şəxsi nümayəndəsi Anjey Kaspşik ilə videokonfrans formatında görüş keçirib.

Görüşdə tərəflər, Ermənistan-Azərbaycan Dağlıq Qarabağ münaqişəsinin tənzimlənməsi prosesi, eləcə də qarşıdan gələn aylarda, qlobal pandemiya sonrası atılacaq addımları müzakirə ediblər.

Artıq ilin 5-ci ayı başa çatmaqdadır və bu müddətdə münaqişənin həlli ilə bağlı prosesi analiz etməyə etiyac var. Məsələ ondadır ki, ilin əvvəlində Ermənistan və Azərbaycan arasında intensiv danışıqlar baş verib. Lakin sonradan bu proses pandemiya səbəbindən səngiyib, lakin eyni zamanda Ermənistan hakimiyyəti də müxtəlif cəhdlərlə danışıqlar prosesini zəiflətməyə cəhd edir.

Bu barədə politoloq Elxan Şahinoğlu Sonxeber.az-a açıqlama verib.

Politoloq bildirib ki, aparılan danışıqlar əslində imitasiya xarakteri daşıyır:

"Koronavirusa görə görüşlər videokonfrans vasitəsilə keçirilib ki, onun da elə bir ciddi nəticəsi olmayıb. Təsəvvür edin, atəşkəs pozulur, ermənilər yenidən təxribatlarla məşğul olurlar və 21-i növbəti təxribata hazırlaşırlar. Dırnaqarası seçdikləri prezidentin Şuşada andiçmə mərasimi keçiriləcək və Paşinyan da bu tədbirdə iştirak edəcək. Bunun özü belə təxribatdır. Çox təəssüf ki, vasitəçilər bu təxribatın qarşısını almırlar və almaq istəmirlər. Belə şəraitdə aydındır ki, vasitəçilərlə keçirilən videokonfransın, onlayn görüşlərin heç bir əhəmiyyəti yoxdur. Şuşa, Laçın, Kəlbəcərdə ermənilər məskunlaşdırma siyasəti həyata keçirir. Vasitəçilərin planına görə bu şəhərlər boşaldılmalı, azərbaycanlılar geri qayıtmalıdırlar.

Amma məskunlaşdırma siyasəti aparılırsa, deməli erməni separatçıları bu bölgələri də boşaltmaq istəmirlər. Vasitəçilər çox təəssüf ki, buna da reaksiya bildirmirlər. Həmçinin Dağlıq-Qarabağda saxlanılan iki girovun qaytarılması məsələsi də hələ açıq qalır ki, vasitəçilər bu məsələyə də aydınlıq gətirmirlər. Bütün bunlar varkən münaqişənin həllində danışqlarda irəliləyişlər gözləmirəm. Yenə də toqquşma riski artıb. Azərbaycan hərbi təlimlərə başlayıb. Erməni separatçıları buna cavab olaraq təlimlər keçirir. Hər iki tərəf başa düşür ki, danışıqlarda nəticə yoxdur və mümkün toqquşma ehtimalı hər keçən gün daha da artır".

F.Ağayeva

Telegramda izləyin

instagramda izləyin