"Belarusun etdiyi manevri Ermənistan edə bilməyəcək və Rusiya ilə razılaşmaq məcburiyyətində qalacaq"-RƏY

Avrasiya İqtisadi İttifaqı (AAİİ) hələ də uzunmüddətli inteqrasiya vəzifələrini həll etmək yolu axtarışındadır. Belə ki, quruma daxil olan dövlətlərin videosammitində AAİİ-nin 2025-ci ilə qədər inkişaf strategiyasını qəbul etmək mümkün olmayıb. Əsas səbəb Belarus və Ermənistanın Rusiyadan alınan qazın qiyməti ilə razılaşmamasıdır.

Rusiya prezidenti Vladimir Putin AAİİ çərçivəsində qazın tranzitinə vahid tarifin tətbiqinin yalnız vahid büdcəyə və vahid vergi sisteminə malik vahid bazarda mümkün olacağını bildirib. Yəni AAİİ daxilində ən qüdrətli dövlətin başçısı məna baxımından qurum çərçivəsində inteqrasiyanın dərin səviyyəyə çatmamasını etiraf edərək bundan gileyləndiyini ortaya qoyub.

Avrasiya İqtisadi İttifaqının "dərin inteqrasiya" yolunda hansı problemlərlə üzləşəcəyi maraqlı məqamalardandır.

Bununla bağlı Sonxeber.az-a iqtisadçı- ekspert Akif Nəsirli danışıb. Ekspert sözügedən ittifaqa Rusiyanın rəhbərlik etdiyini bildirərək Belarusun yaxın zamanda AAİİ dair bir sıra müqavilələrindən çıxıb, Avropadan qaz kəməri çəkəcəyini açıqlayıb:

"İndi publikada geniş olaraq işıqlandırılan məsələ Belarus və İranla bağlıdır. Belarus ola bilsin ki, yaxın zamanlarda AAİİ-nin bir sıra müqavilələrindən çıxıb Avropadan qaz kəməri çəksin. Artıq Belarus Prezidenti Aleksandr Lukaşenko Avropa qaz şirkətləri ilə danışıqlara başlayıb. Ola bilsin ki, əvvələr də qaz danışıqları gedirmiş, sadəcə olaraq bu indi açıqlanıb. Belarus Rusiya qazından imtina etmək və yaxud da qaz təlabatının minumum hissəsini Rusiyadan almaq strategiyasını əsas götürüb".

Ekspert həmçinin AAİİ sammitində sözügedən məsələ barədə Ermənistnın mövqeyinə də aydınlıq gətirib:

"Ermənistana gəldikdə bildirim ki, Ermənistan belə bir potensiala malik deyil. Çünki Ermənistanın qaz təchizat sistemi "Qazprom"un alt sistemidir. Məlum olduğu kimi bir neçə il əvvəl Ermənistanın qaza görə Rusiyaya borcu əvəzinə Ermənistanın bütün qaz şəbəkəsi "Qazprom"un idarəçiliyinə verilib. İndi artıq Ermənistanın seçim imkanı yoxdur. Yəni ki, Belarusun etdiyi manevri Ermənistan edə bilməyəcək və Rusiya ilə razılaşmaq məcburiyyətində qalacaqdır".

Şəlalə Babayeva

Telegramda izləyin

instagramda izləyin