"Cümhuriyyəti quranlar Millət, Vətən, Dövlət üçün öz ailələrini belə qurban verdilər"-Tarixçi-alim

Bu gün Şərqdə ilk demokratik respublikanın - Azərbaycan Xalq Cümhuriyyətinin yaranmasının 102 yaşı tamam olur.

Bu tarixi gün ilə bağlı tarixçi-alim Sonxeber.az-a danışıb. O, bildirib ki, Azərbaycan Xalq Cümhuriyyətinin tarixi əhəmiyyəti ondadır ki, bizim dövlətçi millət olduğumuzu bir daha ortaya qoyub:

Çünki müstəmləkə dövründə belə bir fikir formalaşdırmışdılar ki, bunlar dövlətçi millət deyil, barbardırlar. Tarixdə də dövlətləri olmayıbdır. İndiki İran ərazilərinə də gəlmə olublar, yerli xalqlara öz dillərini güclə qəbul etdiriblər və onlara sahib çıxıblar.

XIX əsrin sonlarından başlayaraq erməni-şudraların yalan tarixini yaradır, indiki İran ərazilərində də farsları şişirtməyə başlayırdılar. XX əsrin əvvəllərində yaradılan Azərbaycan Cümhuriyyəti bütün bu ideologiyanı darmadağın etdi. Onlar dünyaya göstərdilər ki, biz varıq, biz millətik və bu millətin tarixi, dövlətçilik ənənəsi olubdur.

Onların yaratdıqları dövlətin ən böyük əhəmiyyəti isə Azərbaycan adında dövləti ortalığa qoymaları idi. Əgər bunu etməsəydilər, bu gün bu ad unudulub yoxa çıxacaqdı. Bizim düşmənlərimizin də ən böyük məqsədi bax bu idi. Onlar türk dünyasını məhv etmək üçün Azərbaycan adını tarixdən silməyə başlamışdılar. Hamının beyninə yeridirdilər ki, Azərbaycan burada deyil, Güneydə olubdur. Uydurma bir nəzəriyyə yaratdılar ki, Şirvanşahların Azərbaycana dəxli yoxdur. Azərbaycan Cümhuriyyətinin yaradılması bu məqsədin də qarşısını aldı. Azərbaycan adını "Bütöv Azərbaycan" coğrafiyasını əhatə etdiyini ortaya qoydular. Bunu o zaman düşünüb ortaya qoymaq həm də gələcəyə hesablanan strateji məqsəd idi. Bu birbaşa M.Ə.Rəsulzadənin əməyi idi.

İndi gördünüzmü bizim üçün nə böyük nəticə ortaya qoydular. Bütöv Azərbaycan məfkurəsini, azərbaycançılığı bizim üçün siyasi xəttə çevirdilər. Türklüklə azərbaycançılığı ustalıqla birləşdilər. Onların ortaya qoyduqları cəsarət, dövlətə, insanlığa münasibət indiki gəncliyə nümunə olmalıdır. Biz Cümhuriyyət tarixi ilə bağlı dərsləri dönə-dönə öyrənməli, onu yaradanların həyat yolunu dərindən tədqiq edib gəncliyimizə təqdim etməliyik. Təəssüf ki, onlara hələ lazımi qiyməti verə bilmirik. Çünki hələ də təfəkkürümüzdə onların tarixi xidmətlərinə yalnız tarixi hadisələr kimi baxırıq. Tarix isə nəticədir. Tarixdən nəticə çıxarmayan millətlər böyük uğursuzluqlara uğrayırlar. Biz Cümhuriyyət məsələsində ona qarşı düşmən mövqe tutan yerli Azərbaycan bolşeviklərinin də xəyanətini millətə yetərincə verə bilməmişik. Bunların xəyanəti bizim dövlətçiliyimizə ruslardan, ermənilərədən daha ağrılı xəyanətdir.

Düzdü, onları tarix cəzalandırdı, hamısının az qala and yerinə çevirdikləri SSRİ rəhbərliyi güllələtdirdi. Amma onların təfəkkürü hələ yaşayır. Bu gün də bu təfəkkür sahibləri Vətənə asanlıqla xəyanət edərlər. Millət, Vətən, Dövlət atributları müqqəddəsdirlər. Azərbaycan Cümhuriyyətini quranlar Millət, Vətən, Dövlət üçün öz ailələrinin üzərindən belə keçdilər. Bunları hər insan bacara bilməzdi. Biz belə bir nəsil yetişdirməliyik. İnsanda Millət, Vətən, Dövlət hissi öndə olmalıdır. Azərbaycan Cümhuriyyəti qəhrəmanları bizə bunu örnək qoydular"!

F.Ağayeva

Telegramda izləyin

instagramda izləyin