"Bəzi insanlarımız virusa inanmır, guya "qlobal güclərin siyasi oyunu gedir" fikrinə inanırlar"- DEPUTAT

Azərbaycanda insanların mühüm bir hissəsi, o cümlədən tibb işçilərinin də bir qismi koronavirusa inanmır. Bu barədə Milli Məclisin iclasında deputatlar da bildiriblər. Eyni zamanda deputat və tibb mütəxəssisi olan Əhliman Əmiraslanov deyib ki, koronavirusla mübarizədə ən təhlükəli meyl xəstəliyin olmasına inanmamaqdır. Onun sözlərinə görə bu gün tibb işçiləri arasında da virusa inanmayanlar var.Ancaq bu tendensiya yalnız Azərbaycana xas deyil, məsələn sorğulara əsasən Rusiyada əhalinin 23 faizdən çoxu koronavirusun uydurma olduğunu, hər 3 nəfərdən biri isə bu xəstəliyin təhlükəli olmadığını düşünür. Dünyad aisə bu mövzuda onlaral, yüzlərlə iddia var və bu iddiaya inanan milyonlarla insan. İnsanlar nədən koronavirus xəstəliyinə inanmır? Artıq 6 aydan çoxdur ki, planetin bir nömrəli bəlasına çevrilən xəstəliyə inanmayan milyonlaral inan var. Bu şübhənin və laqeydliyin səbəbləri nələrdir? İnsanların şübhədə olması xəstəliyin yayılmasında, ona qarşı effektiv mübarizə aparılmasında hansı mənfi rola malikdir?

Bununla bağlı Sonxeber.az-a danışan deputat Ceyhun Məmmədov bildirib ki, təəssüf ki, aparılan bütün təbliğata və maarifləndirmə işllərinə baxmayaraq, bəzi insanlar məsələyə məsuliyyətsiz yanaşır və bir sıra hallarda yanlış təbliğat aparırlar: "Guya virus yoxdur, hansısa qlobal güclərin növbəti siyasi oyunlarından söhbət gedir. Heç şübhəsiz ki, bu da bəzi insanlarda arxayınlıq və rahatlıq yaradır. Nəticədə isə virus daha geniş yayılır, daha çox insan bu virusa yoluxur. Bu gün dünyada çox ciddi qlobal proseslər gedir. Bir sıra ölkələr bu sınaqdan üzüağ çıxa bilmədilər. İnsanlar küçədə qaldılar, xəstəxanalarda yer olmadı, zəruri tibbi ləvazimatlar tapılmadı. Azərbaycan isə vəziyyətdən tez çıxmaqla yanaşı, 13 ölkəyə dəstək oldu, yardım göstərdi. Sevindirici haldır ki, özünə qapanmadı, bir neçə videokonfrans formatında tədbirlər təşkil etdi. Hər zamankı kimi nümunəvi model nümayiş etdirdi, ölkə başçısının timsalında liderlik keyfiyyətlərini nümayiş etdirdi. Azərbaycan ilk gündən operativ və adekvat qərarlar qəbul etdi, qabaqlayıcı tədbirlər həyata keçirdi. İlk günlər insanlarımız virusla mübarizədə daha ehtiyatlı və diqqətli olmağa çalışdılar. Təəssüf ki, sonrakı dövrdə məhz bu yanlış fikirlər üzündən insanlarda sərbəstlik və rahatlıq müşahidə olunmağa başladı. Təəssüf ki, nəticədə virusa yoluxanların sayında ciddi artım baş verdi. Bu gün dünyada virusun ikinci və üçüncü dalğalarından söhbət gedir. Ona görə hər birimiz diqqətli və məsuliyyətli olmalıyıq. Bu gün virusla ölkəmizdə Prezident İlham Əliyev və Birinci vitse-prezident Mehriban Əliyeva tərəfindən çox ciddi mübarizə aparılır, dövlət milli təhlükəsizliyimizi və vətəndaşlarımızın sağlamlığının qorunması üçün bütün zəruri addımları atır. Vətəndaşlarımız çox diqqətli olmalı, özlərini qorumalıdırlar. Ona görə hər birimiz diqqətli olmalı yanlış təbliğata uymamalı və dövlətin müəyyənləşdirdiyi qaydalara əməl etməliyik. Əks təqdirdə çox ciddi problemlərlə üzləşə bilərik. Əminik ki, ölkəmiz eləcə də, digər dövlətlərin üzərindən qara buludlar tezliklə çəkiləcək və insanlar yenidən normala həyata dönəcəklər. Bunun üçün hər birimiz çalışmalıyıq, özümüzü və yaxınlarımız qorumalıyıq".

Aysel Yusifqızı

Telegramda izləyin

instagramda izləyin