"İki günlük izolyasiya tədbiri qaneedici nəticə verməyəcək" Azərbaycanlı Professordan AÇIQLAMA
Xəbər verdiyimiz kimi sabahdan ölkədə COVID-19 virusunun yayılma sürətinin azaldılması məqsədilə, yəni 2020-ci il 6 iyun saat 00:00-dan 8 iyun saat 06:00-dək Bakı, Sumqayıt, Gəncə, Lənkəran şəhərlərinin və Abşeron rayonunun ərazisində bütün iş, xidmət və ticarət sahələri üzrə fəaliyyət, eyni zamanda ictimai nəqliyyatın və avtomobillərin hərəkəti dayandırılacaq. (xüsusi təyinatlı, qəza-bərpa, təcili tibbi yardım avtomobillərinin və fəaliyyətinə icazə verilən orqanların (qurumların) və təşkilatların xidməti avtomobillərinin hərəkəti istisna olmaqla).
Sabahdan Azərbaycanda tətbiq edilən iki günlük rejim hansı nəticələri göstərəcək?
Bununla bağlı Sonxeber.az-a tibb eksperti Adil Qeybulla danışıb:
"Təcrübələr göstərir ki, iki günlük qadağalar heç nəyə gətirib çıxarmır. İnsanları isti vaxtda evdə oturtmaq elə də asan deyil. Onlar ən azı həyətlərinə çıxacaqlar, bu özü təmas deməkdir. Ona görə də sərtləşdirmədən öncə karantin qaydalarına diqqət etmək lazımdır. Bu qadağalar həftə sonuna, yəni istirahət günlərinə aiddir. Birinci gün insanalar yenə işə gedəcək və həmin nəqliyyatdan istifadə edəcəklər, nəticədə həmin mənzərə baş verəcək. Vətəndaşların bircə dəfə kontaktları yetərlidir ki, kifayət qədər yoluxma olsun. İki günlük izolyasiya tədbiri qaneedici nəticə verməyəcək. Çünki insanlar yenə də təmasda olacaq, yollar açılsa rayonlara gediş- gəliş edəcəklər. Virus rayonlara daşına bilər. Bununla epidemioloji coğrafiyanın genişləndirilməsi proqnozlaşdırılır. Əgər belə davam etsə, xəstəlikdə artım olacaq, bu da xeyli ölüm halları və həmin insanların xəstəxanada müalicə almaması deməkdir. Təsəvvür edin ki, insanın əzizi küçədə yıxılıb ölür, qorxudan heç kim ona yaxın getmir. Belə dəhşətli hal ola bilər".
Professor Adil Qeybulla həmçinin karantin qaydaları üçün tövsiyyə etdiyi modelin adını açıqlayıb, ölkəmizdə həmin qaydaların tətbiq edilməsinin arzuolunan olduğunu bildirib. O, televiziyalarda reklam və verilişilərin maarifləndirmə səviyyəsinin də aşağı olunmasını deyərək koronavirusla bağlı daha ciddi təbliğata ehtiyac olduğunu deyib:
"Artıq ailələr xəstədir. Bizə məlum olan həkim ailəsi var ki, hər ailə üzvünü bir xəstəxanada yerləşdiriblər. Vəziyyət getdikcə dramatikləşə və yoluxma əmsalı arta bilər. Küçədə insanların yıxılıb ölməsinə qədər görə bilərik. Niyə vəziyyət elə yerə çatmalıdır ki? Ona görə də karantin tədbirləri yarı sərt-yarı yumşaq ola bilməz. Karantindirsə, sərt olmalıdır. Əgər yumşaldırıqsa onda karantin davranışlarını sərtləşdirməliyik.
Yaponiya modeli daha uyğundur. Orada heç bir sərt tədbir görülmədi, amma insanların mədəniyyəti və qabiliyyəti, sosial izolyasiyada hər bir qaydanı gözləməyi, xüsusən də əlləri dezinfeksiya etmələri və maska taxmaları sadə gigiyena qaydaları ilə də koronaavirusa qalib gəlməyi mümkün etdi. Televiziyalarda mənasız həkim reklamlarından, insanları bezdirən şou verilişlərindənsə, dövlət təbliğat aparmalıdır. Dövlət makinası buna səfərbər olmalıdır. İqtisadiyyatı tamam dondurmaq olmaz. Azərbaycanın iqtisadiyyatı bilirik ki neftdən asılıdır. İndiki vaxtda biz insanları nə qədər evdə oturmağa məcbur edə bilərik? Real görünmür. Pik həddin yaxınlaşması bizim davranışlarımızdan asılıdır. Ola bilər ki,bu proses iyulda və digər aylarda olsun. Artıb-azalma vətəndaşların davranışlarına bağlıdır".
Şəlalə Babayeva
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş