"Köçəryanın azadlığa çıxan kimi Sarqsyanla görüşü Paşinyanı qorxuya salıb"-RƏY

Girov müqabilində azadlığa çıxdıqdan sonra Robert Koçaryan Serj Sarqsyanla görüşüb. Sarqsyanla görüşdən əvvəl Ermənistanın ikinci prezidenti ilk növbədə ölkədəki vəziyyəti müzakirə etdiyi hərb yoldaşları və komanda dostları ilə görüşüb.

Bu görüşlərin Paşinyan hökumətinə qarşı "Qarabağ klanı"nın resurslarının konsolidasiyası anlamına gəlib-gəlməməsi
Müşahidə olunan siyasi böhran nəticəsində, koronavirusla bağlı çətin vəziyyəti nəzərə alaraq Ermənistanı nə gözləyir (dövlət çevrilişi mümkündürmü)? Davam edən proseslər Qarabağ münaqişəsinə nə kimi təsir göstərəcək? Bu şəraitdə Azərbaycan nəyə hazır olmalıdır?

Mövzu ilə bağlı politoloq Nəzakət Məmmədova Sonxeber.az-a açıqlama verib.

Politoloq bildirib ki, Rusiyada keçirilən Qələbə paradında iştirak etməyən Ermənistanın Baş naziri Paşinyan koronavirus məsələsini əsas gətirdi. Lakin böyük ehtimalla məhkəmənin

Köçəryanı 4 milyon ABŞ dolları müqabilində zaminə buraxması onu çox narahat edib:

"Köçəryan azad olunduqdan 2 gün sonra keçmiş prezident Sarkisyan ona baş çəkib. Köçəryanın zaminə buraxılmasında Rusiyanın rolunun olması sirr deyil. Qarabağ klanına başçılıq edən iki keçmiş prezidentin əsas müzakirə mövzusu heç şübhəsiz Paşinyana qarşı mübarizə məsələsi olub. Köçəryanın azadlıqda olduğu və həbsdən çıxan kimi dərhal onun düşmənləri ilə bir araya gəlməsi Paşinyanı qorxudub. Böyük ehtimalla, o, parada getməkdən ona görə imtina edib ki, ölkədə olmadığı vaxtda Ermənistanda ona qarşı təxribat, çevriliş baş verə bilərdi. Paşinyan çox güman ki, buna görə də Moskvaya getmək istəməyib. Koronavirus karantini başa çatdıqdan sonra Ermənistanı çox çətin dövr gözləyir.

Yoxsul ölkə pandemiya nəticəsində daha da ağır vəziyyətə düşəcək, əhali çox çətin sosial durumla qarşılaşıb. Çiçəklənən Ermənistan partiyasının sədri Qaqik Tsarukyan da belə davam edərsə, 3 aydan sonra əhalinin aclıqla üzləşəcəyini demişdi. Paşinyanın reytinqi xeyli geriləyib və belə bir şəraitdə siyasi rəqibləri bu fürsətdən yararlanaraq əhalini ayağa qaldırmağa çalışa bilərlər. Əgər Qərbdəki güc mərkəzləri, eləcə də İran Paşinyana yardım etməsə, onun siyasi karyerası faciəli şəkildə başa çata bilər. Ölkənin resursu yoxdur, xalq səfalət içində yaşayır və digər tərəfdən də daxildən Qarabağ klanı, xaricdən Rusiya Paşinyanın səhvlərindən istifadə edib onu hakimiyyətdən uzaqlaşdırmaq üçün fürsət gözləyirlər.

Qarabağ məsələsinə bu proseslərin hər hansı həlledici təsiri gözlənilmir. Qarabağ dünya erməniliyinin olmazsa olmazıdır və hakimiyyətə istər şovinist, istər demokrat pərdəsi altında kimin gəlməsindən asılı olmayaraq onlar xoşluqla Qarabağı Azərbaycana qaytarmayacaqlar. Yalnız bir real həll variantı var - Rusiya ilə Azərbaycan arasında. Azərbaycanın KTMT və Avrasiya İqtisadi Birliyinə daxil olması, Azərbaycan ərazisində rus qoşunlarının yerləşdirilməsi ilə nəticələnən razılaşma əldə olunarsa, Qarabağın ətrafında işğal olunmuş rayonların bir neçəsi Azərbaycana qaytarıla bilər, bəlkə də Qarabağ erməniləri məcburi şəkildə nominal olaraq Azərbaycanın tərkibinə qaytarıla bilər. Lakin Azərbaycanda marağı olan böyük güclərin Rusiyanın bu dərəcədə Azərbaycana əl qoymasına icazə verməsi inandırıcı deyil. Ona görə də, Ermənistanda nə baş verməsindən asılı olmayaraq Qarabağ məsələsində irəliləyiş görünmür. Bu situasiyadan yararlanmaq Azərbaycanın qərarına bağlıdır, biz yaranmış fürsətdən istifadə etmiriksə, Ermənistanda baş verənlərin Qarabağ məsələsinə heç zaman təsiri olmayacaq".

F.Ağayeva

Telegramda izləyin

instagramda izləyin