"Pandemiyadan sonra ABŞ-la Çin arasında liderlik savaşı daha da qızışacaq"-RƏY

Belarus Prezidenti Aleksandr Lukaşenko Çin və ABŞ-ın dünyanı yenidən bölüşdürmək uğrunda mübarizə apardıqlarını bildirib.
Bu barədə "Belarus 1" telekanalı məlumat yayıb.

A.Lukaşenkonun sözlərinə görə, "yeni fövqəldövlət" ABŞ-a meydan oxuyur. O, həmçinin, Çini "güclü nüvə nəhəngi" adlandırıb.

"Əlbəttə, bu, amerikalıları narahat edir. İnhisarçını narahat etmək nə deməkdir? Bu, yoxsullaşmaq deməkdir", - deyə A.Lukaşenko bildirib.

Belarus lideri, eyni zamanda, Çinin ixrac baxımından birinci, istehsal üzrə isə ABŞ-dan sonra ikinci yerdə olduğunu xatırladıb. Prezident əlavə edib ki, Çin ən müasir silahları mənimsəyib və "kosmosa çıxıb".

"ABŞ mövqelərini itirməyə başlaması təhlükəsini hiss edir", - deyə A.Lukaşenko vurğulayıb.

Bu barədə politoloq Nəzakət Məmmədova Sonxeber.az-a açıqlama verib.
Politoloq bildirib ki, ABŞ-da Trampın prezidentlik müddəti ölkənin təkcə geosiyasi yox, eyni zamanda geoiqtisadi rəqibi Çinlə ticarət müharibələri dövrü kimi yadda qaldı və o, yenidən prezident seçilərsə, dünya iki güc nəhənginin hegemonluq uğrunda mübarizəsinin şahidi olacaq:

"ABŞ və Çin arasında rəqabət təkcə Trampla bağlı deyil, eyni zamanda koronavirus pandemiyasının nəticələrindən asılı olacaqdır. Pandemiyadan sonra yaranacaq dünya düzənində

ABŞ və Çin piramidanın zirvəsində olmaq uğrunda mübarizə aparmaqda davam edəcəklər.

Rusiya və digər iddialı dövlətlər liderlik iddialarında uğur qazana bilməyəcəklər, sanksiyalar, pandemiya onun potensialının güclü olmadığını göstərdi. Tramp Çini ABŞ-ın ən əsas rəqibi kimi görməkdə davam edir və pandemiya bunu daha da gücləndirdi. ABŞ və Çin arasında ticarət savaşı səngimək bilmir. Tramp hətta Rusiyanın Böyük Yeddiliyə qayıtmasına dəstək verdi. Çünki o, Çini öz ölkəsi üçün Rusiyadan daha təhlükəli rəqib hesab edir. Eyni zamanda, ölkəsinin istədiyi nəticəni əldə etmədiyi Yaxın Şərq siyasətində prosesi uğurla başa çatdırmaq, İranı təkləyib müttəfiqlərindən təcrid edib istənilən güzəştə məcbur etmək üçün Rusiyanın dəstəyinə ehtiyac var. Bu səbəbdən Tramp Rusiyanın "G7" klubuna qatılmasına səylə çalışdı.

Tramp daxili və xarici rəqiblərin müqavimətinə baxmayaraq, Rusiyanı dəstəklədi və bununla ABŞ prezidentinin növbəti seçkilər üçün yenidən Moskvadan dəstək almaq planlarının olması istisna edilmir. Çinlə mübarizənin qarşıdakı aylarda nəticəsi ABŞ-da prezident seçkilərinə təsir edə bilər. Əgər pandemiyanın ABŞ üçün ağır nəticələri aradan qaldırılmayacaqsa, Trampın prezidentlik məsələsi sual altında qalacaq. Eyni zamanda, ABŞ öz ərazisində baş verən iğtişaşlarda Çinin əlinin olmasını güman edir. İğtişaşlarda canfəşanlıq edən təşkilatlar solçu radikal təşkilatlardır və onların kommunist Çin tərəfindən yönəldilmiş olduğu şübhələri var. Çinin İsraildəki səfirinin ABŞ tərəfindən öldürülməsi ehtimalı da səslənmişdi.

ABŞ Çinlə 500 milyard dollarlıq ticarət müqaviləsini denonsasiya etdi, uyğur türklərinə qarşı Çinin soyqırımı həyata keçirməsinə dair həyəcan təbili çalaraq Çinə sanksiya tətbiq edəcəyini bildirdi. Təbii ki, burada ABŞ dövlət katibi, Çinə qarşı savaşın öncüllərindən biri Pompeonun atasının öldürülməsində Çin izinin olması da rol oynayır. Artıq dünyanın önəmli ölkələri, hətta ABŞ-ın müttəfiqləri iki güc arasında seçim barədə tərəddüd edirlər. İngiltərə, İsrail, Türkiyə və s. ölkələr hansı tərəfdə olmaq barədə qərar vermək mərhələsinə gəlib çatıblar və qalibin kim olmasına bunun da təsiri mütləq olacaqdır".

F.Ağayeva

Telegramda izləyin

instagramda izləyin