"Peyvənd tapılana qədər tibbi maskadan istifadə etmək zəruridir"-Deputat

Hazırda Azərbaycanda koronavirusla mübarizə çərçivəsində əsas vəzifə yoluxma hallarının artım dinamikasını dayandırmaq və bu sahədə müsbət tendensiyaya, yoluxma hallarının azalmasına nail olmaqdır. Karantin rejimi sərtləşdiriləndən sonra yeni yoluxma hallarında kəskin artım dinamikası dayanmış və gündəlik orta rəqəm 520-550 arasında müəyyənləşmişdir. Əvvəlki təcrübəyə əsasən demək olar ki, karantinin ilkin təsiri onu tətbiq edəndən bir müddət sonra daha aydın görünməyə başlayır. Bu mənada, qarşıdan gələn günlərdə yoluxma hallarının sayında enmənin müşahidə olunması ehtimalı çox böyükdür.

Karantinin uzadılmasının xeyiri, əhalinin karantin qaydalarına riayət etməsi, qoruyucu vasitələrdən istifadəsinin zəruriliyi barədə deputat Azər Badamov Sonxeber.az-a açıqlama verib.

Deputat bildirib ki, tətbiq olunmuş sərt karantin rejimi koronavirus infeksiyasına yoluxma süətinin qarşısının alınması baxımından çox əhəmiyyətlidir:

"Koronavirus qlobal pandemiya elan olunduqdan sonra tətbiq olunan birinci sərt karantin rejimində müsbət nəticələri əldə etmişdik. İndi də yoluxma dinamikasının stabilləşməsi ilə 3-4 gündən sonra yoluxanların sayında azalma olacağını düşünrəm. Sərt karantin rejimi insanların gündəlik həyatında müəyyən çətinliklər yaratsa da, sağlamlıqlarının qorunması üçün vacibdir. Ona görə də hamı tərəfindən tibbi maskanın taxılması, sosial məsafənin gözlənilməsi və şəxsi gigiyenik qaydalara mütləq şəkildə əməl olunması vacibdir.

Əgər bu tələblərə hamılıqla əməll etsək sərt karantin rejiminin yenidən uzadılmasına ehtiyac yaranmayacaqdır. Biz Milli Məclisin plenar iclasında İnzibati Xətalar Məcəlləsinin 211.2 maddəsində nəzərdə tutulmuş inzibati cərimələrin iki dəfə artırılması ilə əlaqədar qərar qəbul etdik. Hesab edirəm ki, həm də karantin rejiminin tələblərinin icrasına nəzarət gücləndirilməli, məsuliyyətsiz insanlar ciddi şəkildə cəzalandırılmalıdır. Biz müstəqil şəkildə dərk edib qaydalara riayət etməyə yox, gözümüzdə qorxu ilə yaşamağa öyrəşmişik.

Mütləq şəkildə təsir üsulları tətbiq olunmalıdır ki, koronavirusa qarşı mübarizədə insanlar məsuliyyətlə yanaşsın. Kimsə cəzalanmaq istəmirsə, dəyəri çox da yüksək olmayan 30 qəpiklik tibbi maskadan istifadə etsin. Biz koronavirusa qarşı peyvənd icad olunana qədər tibbi maska ilə həyatımızın davamına öyrəşməliyik. Başqa yolumuz yoxdur. Ən azından özümüzün və doğmalarımızın sağlamlığını istəyiriksə tibbi maska ilə yaşamalıyıq. Biz birlikdə güclüyük"!

F.Ağayeva

Telegramda izləyin

instagramda izləyin