"Cərimə elə həddə olmalıdır ki, onu ödəməmək üçün qaydalara riayət edilsin"-Həkim
Hazırda Azərbaycanda koronavirusla mübarizə çərçivəsində əsas vəzifə yoluxma hallarının artım dinamikasını dayandırmaq və bu sahədə müsbət tendensiyaya, yoluxma hallarının azalmasına nail olmaqdır. Karantin rejimi sərtləşdiriləndən sonra yeni yoluxma hallarında kəskin artım dinamikası dayanmış və gündəlik orta rəqəm 520-550 arasında müəyyənləşib. Əvvəlki təcrübəyə əsasən demək olar ki, karantinin ilkin təsiri onu tətbiq edəndən bir müddət sonra daha aydın görünməyə başlayır. Bu mənada, qarşıdan gələn günlərdə yoluxma hallarının sayında enmənin müşahidə olunması ehtimalı çox böyükdür.
Maraqlıdır, karantin rejiminin dinamikaya müsbət təsiri, yeri gələrsə onun uzadılmasının və əlavə tədbirlərin görülməsinin zəruriliyi nə dərəcədə olacaq? Əhalinin karantin qaydalarına riayət etməsi, qoruyucu vasitələrdən istifadəsinin zəruriliyi effektini göstərəcəkmi?
Bununla bağlı Sonxeber.az-a ATU - nun dosenti, cərrah həkimi Ədalət Rüstəm danışıb:
"Karantin rejimi sərtləşdirildi, cərimələr dünəndən 2 dəfə artırılsa da sərtləşdirmə əlamətləri yenə də görünmür. Küçələrdə insanlar yenə çoxdur və ən acınacaqlısı odur ki, onların böyük əksəriyyəti maskasızdır. Maskalıların da yarısı çənə-boğazını örtür. Marketlərdə maskasız insanlar yenə çoxdur. Bankların qarşısında insanların böyük əksəriyyəti artıq maska taxsa da ara məsafəsi gözləmirlər. 520-550 rəqəmi COVİD-19 xəstəxanalarina gündəlik qəbul olunan, yoluxma təsdiq olunmuş xəstələrin sayıdır. Yoluxma faktı təsdiq olunmuş, evdə müalicə olunan (NK-nin məlum qərarına gorə TƏBİB-in tövsiyələri əsasında) və olunmayan yüngül, asimptomatik xəstələr, onlar bütün xəstələrin 70-80%-ni təşkil edir, statistikaya daxil edilmirlər. Faiz nisbəti ilə onların gündəlik sayı 3500-4500 arasındadır. Bu rəqəmlərə qrupu, zökəm, digər yaxın xəstəliklər keçirən, lakin diaqnostik test aparılmayan xəstələri də əlavə etsək günlük yoluxma sayının 5000-5500 həddlərində olması düşüncəsindəyəm. İstənilən cərimə insanların cərimələnməsi, cərimələrin ödənilməsi məqsədi yox, insanların mümkün qədər az sayda cərimələnməsinə xidmət etməlidir. Cərimələrin miqdarı elə hədlərdə olmalıdır ki, insanlar həmin cərimələri ödəməmək üçün müvafiq qayda pozuntuları etməsinlər. Gürcüstan DİN-in məlumatlarına görə mart ayının sonlarından bu günə qədər bu ölkədə 13 nəfər maska istifadə etmədiyinə görə 3000 lari (1000 dollar) cərimələnib. O da mart ayının sonlarında, cərimələrin tətbiq etdiyi ilk günlərdə. Azərbaycanda da belə təcrübə var. Yekun olaraq, düşüncələrimə görə sərtləşdirilmiş karantin rejimi xəstə sayının cüzi azalmasına səbəb olacaqdır. Çünki səlahiyyətli qurumlar tərəfindən rejimin sərtləşdirilməsi yetərincə təmin edilmir".
Ədalət Rustəm bildirib ki, 2 nəfər (3-5 yox) sosial məsafə gözləmədən qarşı-qarşıya söhbət edirsə (UST-ün məlumatlarına görə) və onlardan biri yoluxmuşsa, digərinin yoluxma ehtimalı 50%-dir. Yoluxmuş asqırdıqda və ya yüksəkdən öskürdükdə digərinin yoluxma ehtimalı 80%, öpüşərlərsə 95-100%-dir: "Həmin 2 nəfərdən biri maskalıdırsa yoluxma ehtimalı 2 dəfə azalır, hər ikisi maskalıdırsa bu ehtimal 10%-ə qədər, bəzi elmi mənbələrə görə isə sosial məsafə (2 metr) gözlənilərsə, 1,5%-ə qədər azalır. Maskanın əhəmiyyəti bu qədər böyük olduğundan onun üzərində bütün dünyada bu qədər çox dayanırlar".
Şəlalə Babayeva
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş