"Cəbhədəki təxribat hallarının səbəbləri və bunun mümkün nəticələri"-RƏY
Ermənistan-Azərbaycan döyüş xəttində gərginlik yenidən yüksəlib. Son günlər atəşkəsin gündəlik pozulması halları kəskin şəkildə artıb. Əgər yazda gündəlik 20-25 atəşkəs pozulması halları olurdusa, son həftələrdə bu rəqəm 60-70-ə yüksəlib.
Atəşkəsin pozulması hallarının artması ermənilərin Azərbaycanı təxribata çəkmək, cəbhə xəttində gərginlik və yeni toqquşmalara cəlb etmək istədiyini göstərir. Daha əvvəl də bu cür taktikadan istifadə olunub. Ardıcıl olaraq atəşkəsin pozulması halları Azərbaycanın cavab atəşindən sonra hərbi əməliyyatlara çevrilib.
Görünən odur ki, Ermənistan tərəfi ölkə daxilində siyasi vəziyyətin gərginləşməsi, sosial-iqtisadi sahədə artan narazılığı ört-basdır etmək, onu xaricə yönəltmək üçün ənənəvi taktikasından istifadə etməyə çalışır.
Cəbhədəki təxribat hallarının səbəbləri və bunun mümkün nəticələri ilə bağlı politoloq Nəzakət Məmmədova Sonxeber.az-a açıqlama verib.
Politoloq bildirib ki, cəbhədəki təxribat hallarının artmasının bir sıra səbəbləri var:
"Ermənistan tərəfi üçün Qarabağ məsələsi çox geniş məqsədli bir planın əsasını təşkil edir. Bura yalançı "tarixi ərazilərin geri qaytarılması" tezisindən tutmuş Ermənistan daxilindəki siyasi vəziyyətin təzahürlərinə qədər bir çox məsələləri əhatə edir. Hazırkı situasiyadan baxdıqda vəziyyətin son dərəcə gərgin olduğunu müşahidə edirik. Ermənistan böyük güclərin poliqonuna çevrilib. Demokratiya - avtoritarizm, Qarabağ klanı - Soros qruplaşması, Diaspora - Erməni kilsəsi kimi əks qüvvələr arasında qarşıdurma ölkəni çətin vəziyyətə salıb. Bunu Ermənistanda demokratiya mübarizəsi kimi də qəbul edənlər var, çünki Paşinyan bu xətti əsas götürdüyünü iddia edir. Fakt isə ondan ibarətdir ki, Ermənistan ABŞ - Rusiya - İngiltərə - AB - İran və digər böyük güclər arasında sıxışıb-qalmışdır.
Orada da AB ilə Assosiasiya sazişi imzalanma məsələsi, Rusiya ilə münasibətlər və s. qarışıq məsələlər həllini gözləməkdədir. Ermənistan ordusunun təxribatçı hərəkəti həm ordu üzərində Paşinyanın nəzarət imkanlarının olmaması, eyni zamanda ordunun Rusiyaya bağlı olması, daxili siyasi mübarizədə silahlı qüvvələrdən alət kimi istifadə edilməsi ilə bağlıdır. Ordu həm ölkə daxilində iqtidar savaşı uğrunda mübarizədə çevriliş məqsədilə istifadə oluna, eyni zamanda cəbhə xəttində - istər işğal olunmuş ərazilərdə qoşunların təmas xəttində, istərsə də Ermənistan - Azərbaycan dövlət sərhəddində təxribat törədə bilər və törətməkdədir.
İstər Azərbaycan Milli ordusunun, istərsə də, Dövlət Sərhəd xidmətinin çoxlu sayda hərbi qulluqçularının, istərsə də dinc mülki əhalimizin öldürülməsi bunu sübut edir. Əslində, istər dövlət sərhəddində, istər işğal olunmuş ərazilərdə təmas xəttində hər bir ölüm faktı ciddi hadisədir və araşdırılmalıdır. Lakin Prezident İlham Əliyev də qeyd etdi ki, ATƏT-in Fakt Araşdırıcı missiyası 10 il əvvəl bölgədə olub. Ondan sonrakı illərdə Ermənistan ordusu tərəfindən çoxsaylı cinayətlər baş verib. Bunların hamısının haqq-hesabı sorğulanmalıdır. Faktiki olaraq kiçik bir dövlətəbənzər qurum başqa bir dövlətin ərazisini işğal edib, onu silahla, müharibə ilə şantaj edir, əhalisini qorxu altında saxlamağa çalışır, yeni ərazi iddiaları ilə çıxış edir. Ermənistan çoxdan durdurulmalı və cəzalandırılmalı idi, lakin bu, baş vermir.
O zaman dünya Cənubi Qafqazda yeni müharibəyə hazır olmalıdır. Bu müharibə gec-tez növbəti dəfə alovlanacaq, bunu ya işğalçı Ermənistan ordusu başlayaraq növbəti dəfə dünyanı fakt qarşısında qoymağa çalışacaq, ya da öz ərazi bütövlüyünü bərpa etmək üçün Azərbaycan. Amma bu savaş qaçılmazdır və bunun qarşısını almağın tək yolu məsələni sülh yolu ilə ədalətli həll etməkdən keçir".
F.Ağayeva
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş