"Pirallahı Sənaye Parkında əczaçılıq məhsullarının istehsalı ölkəmiz üçün yeni bir sahədir"- RƏY

Bakı və Kiyev Pirallahı Sənaye Parkında ortaq əczaçılıq müəssisəsinin yaradılması üzrə əməkdaşlıq prosesini intensivləşdirmək niyyətindədirlər. Müvafiq müqavilə cari ilin payızında planlaşdırılan Azərbaycan-Ukrayna Hökumətlərarası Komissiyasının iclasında imzalanacaqdır. Üç il əvvəl Azərbaycan İnvestisiya Şirkəti (AİŞ) və Ukraynanın "insulin" və digər dərmanların istehsalında ixtisaslaşmış şirkəti "İndar" artıq niyyətləri ilə bağlı memorandum imzalamışdılar.

Bununla bağlı Sonxeber.az-a danışan deputat Azər Badamov bildirib ki, Azərbaycanda tikilmiş sənaye parkları sənaye potensialımızın sıçrayışlı artımını təmin edəcəkdir: "Cari ilin 5 ayında ölkəmizin ümumi iqtisadi artımında 1.7% gerilənmə olsa da qeyri-neft sənayemizin 16% artması məhz yeni tikilmiş sənaye parklarının sayəsində nail olunubdur. Bu sənaye parkları ən son texnologiyalarla təchiz olunaraq istehsal proseslərinə qoşulur və istehsal olunan məhsulların dünya bazarlarında rəqabət qabiliyyətliliyi yüksəkdir. Həm də sənaye parklarının ixtisaslaşması müxtəlif olduğundan istehsal olunan məhsulların geniş ceşidinə gətirib çıxardır. Pirallah Sənaye Parkında əczaçılıq məhsullarının istehsalı ölkəmiz üçün yeni bir sahədir. Bu, həm yeni iş yerlərinin yaradılmasıdır, həm də bu gün gündəlik təlabatı artan dərman və tibbi məmulatların istehsalı deməkdir. Bu parkda istehsal olunan əczaçılıq məhsulları həm ölkəmizin təlabatını ödəyəcək, həm də ixrac olunacaqdır. Pirallahı Sənaye parkının fəaliyyətinin genişləndirilməsi məqsədilə müxtəlif ölkələrin aparıcı əczaçı şirkətləri ilə müqavilələr imzalanır və yeni istehsal proseslərinin fəaliyyətə başlanması üçün işlər görülür. Sənaye parklarına 7 il ərzində xüsusi güzəştlər tətbiq olunur və bu parklarda yeni rezidentlərin fəaliyyət göstərməsi üçün bütün infrastrukturla təmin olunmuşdur. Düşünürəm ki, Pirallah Sənaye Parkına gələcəkdə də maraq artacaq, ölkəmizdə vətəndaşlarımız üçün lazımı müxtəlif çeşidli dərman preparatları istehsal olunacaqdır və bu gün üçün vacib hesab edirəm".

Aysel Yusifqızı

Telegramda izləyin

instagramda izləyin