"Çalışmalıyıq ki, insanlarımız ilk növbədə daxildə ayıq- sayıq olsun, təxribatlara uymasınlar"- Fazil Mustafa
Ermənistan silahlı qüvvələri Azərbaycan-Ermənistan dövlət sərhədinin Tovuz istiqamətində mövqelərimizi ələ keçirmək məqsədilə artilleriya atəşindən istifadə edərək hücuma keçməyə cəhd göstərib. Bu, Ermənistanın Azərbaycana qarşı təcavüzkarlıq və işğalçılıq siyasətini davam etdirmək və genişləndirmək niyyətində olduğunu bir daha nümayiş etdirir. Növbəti erməni təxribatı sülh danışıqlarını tam iflasa yaxınlaşdırmaqla Azərbaycanın qarşısında torpaqlarını işğaldan azad etmək üçün güc istifadə etməkdən başqa alternativ qoymur.
Azərbaycan Respublikası Müdafiə Nazirliyindən verilən məlumatlara görə, Azərbaycan Ordusu düşmən təxribatının qarşısını layiqincə alıb, Ermənistan ordusuna sarsıdıcı zərbə vurub. Azərbaycan Ordusunun mövqelərini ələ keçirtməsi cəhdlərinin qarşısı qətiyyətlə alınıb və hər hansı ərazi itkisinə yol verilməyib. Hazırda cəbhə xətti boyu əməliyyat şəraiti qoşunlarımızın nəzarəti altındadır.
Rəsmi Bakı işğalçı Ermənistanın növbəti hərbi təxribatına kəskin reaksiya verib. Azərbaycan Respublikası Prezidentinin köməkçisi, Prezident Administrasiyası xarici siyasət məsələləri şöbəsinin müdiri Hikmət Hacıyev bildirib ki, Ermənistan tərəfindən Ermənistan-Azərbaycan sərhədində artilleriya qurğularından istifadə edərək Azərbaycan Silahlı Qüvvələrinin mövqelərinə hücum edilməsi təcavüzdür, güc tətbiq etmək aktıdır və növbəti təxribatdır. Ermənistan bu kimi hərbi avantüra yolu ilə üzv olduğu hərbi-siyasi təşkilatları Ermənistan-Azərbaycan münaqişəsinə cəlb etməyə, Azərbaycana qarşı törətdiyi işğal və təcavüzün məsuliyyətindən boyun qaçırmağa çalışır. Yaranmış vəziyyətə görə məsuliyyət tam şəkildə Ermənistan rəhbərliyinin üzərinə düşür.
Azərbaycan Xarici İşlər Nazirliyinin rəsmi açıqlamasında da bildirilir ki, Ermənistan təxribatçı əməlləri ilə üçüncü ölkələri Ermənistan-Azərbaycan münaqişəsinə cəlb etməyə çalışır. Eyni zamanda Ermənistanın bu təxribatı Ermənistan-Azərbaycan Dağlıq-Qarabağ münaqişəsinin tənzimlənməsi üzrə ATƏT-in Minsk Qrupunun həmsədrlərinin vasitəçiliyi ilə aparılan danışıqların mahiyyətini ciddi şübhə altına alır.
Sonxeber.az-a millət vəkili Fazil Mustafa ötən gün Tovuz istiqamətində cəbhə bölgəsində baş verən hadisələrdən danışıb:
"Ermənilər Kollektiv Təhlükəsizlik Müqaviləsinin üzvü olduqlarına görə və bütövlükdə bağlanan müqaviləyə əsasən başqa ölkələrin də bu prosesə müdaxilə etmək imkanını düşünərək bu addımı atırlar. Yəni dövlət sərhəddini pozurlar. Azərbaycan tərəfinin verdiyi cavablardan sonra digər müttəfiq olan ölkələrlərlə məsələnin birlikdə müəyyən dərəcədə gündəmə gətirməyə çalışırlar. Bu düşünülmüş taktikadır. Diqqət etsəniz daxildə müəyyən hadisələr baş verdi. Yəni daxildə də bəzi məsələlərin gərginləşməsi istiqamətində addımlar atırlar. Adətən bizdə vətənpərvərlik orduya və dövlətə kömək məqsədilə edilir. Kimsə yolu bağlayıb, Qarabağ bizimdir deyə çığırırsa, başqa məqsəd güdülür. Qarabağ uğrunda kimlər döyüşmək istəyirsə hərbi komissarlığa müraciət edir və bununla da müharibəyə qoşulurlar. Gecənin bir saatında "Qarabağ bizimdir" deyə yürüş etməyin mənası təmamilə fərqli alınır. Ən təhlükəli simptomlar baş verir. Çalışmalıyıq ki, insanlarımız ilk növbədə daxildə ayıq- sayıq olsunlar, təxribatlar uymasınlar. Hər hansı şəkildə dövlətə kömək etmək, Qarabağ üçün canıyananlıq təqdirolunandır, amma bunu dövlətin iradəsinə zidd formada həyata keçirmək bilavasitə təxribata yönləndirmək deməkdir".
Millət vəkili vətəndaşlarımızın diqqətli olmalarını, emosional yanaşma ortaya qoymamalarını tövsiyyə edib:
"Öncədən planlaşdırılmış canlı yayım, vətəndaşları təhrik etmə və digər məsələlərdə diqqətli olmalıyıq. Bu təsadüfi deyil. Olan hadisənin erməni hücumu ilə eyni vaxta düşməsi də onu göstərir ki, həm xaricdən ermənilər vasitəsilə böyük güclər Azərbaycana təzyiqlərini başlayıblar, həm də daxildən qarşıdırıcılıq funksyasını yerinə yetirərək prosesləri körükləmək niyyəti güdürlər. Qarabağ fonunda olan narazılıqları ortaya qoymaq vətənpərvərlik mənasına gəlmir. Dövlət əgər özü tədbir görürsə, əsgərimiz döyüşür, ordumuz hərbi sursat və texnika ilə düşmənin qarşısında dayanırsa, burda Qarabağ kartından populistcəsinə istifadə etmək olmaz".
Şəlalə Babayeva
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş