Erməni təxribatı Misir mətbuatında-FOTO

Misir mətbuatında Azərbaycan diasporunun Ermənistanın təxribatı ilə bağlı bəyanatı yayılıb.

Sonxeber.az-ın məlumatına əsasən, Misirin kütləvi informasiya vasitələri alwasela.com, wwnewss.com, saadaonline.net, albidda.net, alwataneamag.com, dmcnews.org, asiaelyoum.com, shbabalnil.com və.s xəbər saytlarında, Ermənistan silahlı qüvvələri tərəfindən Tovuz istiqamətində törədilən təxribatla bağlı Azərbaycanın bu ölkədəki diasporunun sədri Dr. Seymur Nəsirovun bəyanatı yayılıb.
Bəyanatda deyilir: Dünya koronavirus pandemiyası ilə mübarizə apararkən, erməni silahlı qüvvələri ağır artilleriya vasitələrindən istifadə edərək, Ermənistanla sərhəddə yerləşən Azərbaycanın Tovuz rayonu istiqamətindəki bəzi mövqelərini ələ keçirməyə cəhd edib. Azərbaycanın Qarabağ və ətrafındakı yeddi rayonu işğal edərək, bir milyon azərbaycanlını öz dədə-baba yurdundan didərgin salan erməni işğalçı qüvvələri, bu dəfə Qarabağdan 100 kilometr uzaqda yerləşən bölgələri ələ keçirməyə cəhd göstərib. Azərbaycan silahlı qüvvələri düşməni geri çəkilməyə məcbur edib.

Ermənistan ordusundan qat-qat güclü olan Azərbaycan ordusu hələ də münaqişənin sülh yolu ilə həll olunmasını dəstəkləyir. Amma onun səbrinin də həddi vardır.

Bəyanatda Misir ictimaiyyətinə Ermənistan-Azərbaycan Dağlıq Qarabağ münaqişəsinin tarixi və səbəbləri barədə məlumat verilir. Ermənistan ATƏT-in Minsk qrupunun himayəsi ilə aparılan danışıqlar prosesində qeyri-konstruktiv mövqe nümayiş etdirir və davamlı olaraq atəşkəsi pozur. Eyni zamanda, işğal olunmuş Azərbaycan torpaqlarının dərhal azad edilməsi və işğalçı Ermənistanın qoşunlarının həmin əraziləri tərk etməsinə dair BMT Təhlükəsizlik Şurasının dörd qətnaməsi də yerinə yetirilmir.

Azərbaycan icmasının bəyanatında vurğulanıb ki, Misir Azərbaycanın dövlət müstəqilliyini tanıyan ilk dövlətlərdən biri kimi, Dağlıq Qarabağ da daxil olmaqla ölkəmizin ərazi bütövlüyünü tanıyır.

"Azərbaycan xalqı bizim ədalətli mövqeyimizi dəstəklədiyinə görə qardaş ölkəyə minnətdardır", -deyə məqalənin sonunda bildirilir.

Telegramda izləyin

instagramda izləyin