Milli Məclisin qarşısındakı hadisə ilə bağlı - Deputatdan REAKSİYA

Xəbər verdiyimiz kimi Bakının ayrı-ayrı yerlərində, küçə və prospektlərində Azərbaycan Ordusuna dəstək aksiyası keçirilib. Əllərində Azərbaycan bayraqlarını tutmuş minlərlə insan küçələrə axışaraq "Qarabağ" şüarını səsləndiriblər.Əsasən gənclərin iştirak etdiyi aksiyada habelə hərbçilərə dəstək nümayiş etdirilib, şəhidlərin xatirəsi ehtiramla yad olunub. Aksiya Şəhidlər Xiyabanına yürüşlə davam edib. Lakin yürüş təxribatçılar tərəfindən pozulub. Onlar ayrı-ayrı şüarlar səsləndirərək yürüş itirakçılarını ixtişaşa səsləyiblər.

Bununla bağlı Sonxeber.az-a danışan deputat Ramil Həsən bildirib ki, iyulun 12-dən başlayaraq erməni silahlı qüvvələrinin Tovuz rayonu istiqmətində təxribatı nəticəsində artıq bir neçə gündür ki, davam edən döyüşlərdə vətən oğullarımız torpaqlarımızı qəhrəmancasına qoruyaraq bir millimetr də olsa ərazimizi düşmənə verməmişdir:
"Düşmənlə mübarizə aparmaq təəssüf ki, itkisiz olmur. Qürur və kədər hissi ilə qeyd etmək istəyirəm ki, vətən oğullarımız ərazi bütövlüyümüz üçün qəhrəmancasına vuruşaraq şəhidlik mərtəbəsinə ucaldılar. Ali baş komandan cənab İlham Əliyev ölkənin müdafiə və hərb sənayesinin, xarici siyasətinin gücləndirilməsi, ərazi bütövlüyümüzün bərpa edilməsi istiqamətindən ölkə başçısı kimi çox mühüm addımlar atmaqdadır. Bu gün Azərbaycan ordusu bölgədə, regionda və dünyada sayılan, seçilən ordulardandır. Əlbəttə insanlarımızın ordumuzda rüh yüksəkliyi yaradıb, daim hərbiçilərimizin yanında olduqlarını göstərməsi qürurvericidir. Hər bir vətəndaş kimi biz də ordumuzla qürur duyuruq. Dünən insanlarımız şəhərin müxtəlif hissələrində ərazi bütövlüyümüzün qorunması üçün canlarından keçən və yaralanan vətən oğullarımıza dəstək olmaq üçün vətəndaşlarımızın bayrağımızı fəxrlə dalğalandıraraq yürüş təşkil etməsi hər birimizi qürurlandırmışdı. Amma təəssüf ki, bu qürurverici mənzərəyə çirkin əllər uzadıldı.

Gecə saat 2-dən sonra bir qurup təxribatçılar, yəni 5-ci kalonun nümayəndələri ölkəmizdə sabitliyi pozmağa çalışan sapı özümüzdən olan baltalar dövlətimizdə çaxnaşma və təxribat törətmək üçün Milli Məclisin binasına hücum ediblər. Azərbaycan dövləti hüquqi və güclü dövlətdir. Dövlətimizdə əsas qanunun aliliyidir. Hər bir Azərbaycan vətəndaşı cənab prezidentin ətrafında sıx birləşmişdir. Bu birliyi də heç kim poza bilməz.

Daxili İşlər Nazirliyinin müvafiq orqanları zamanında müdaxilə edərək insanların xoş niyyətlərini xaosa və ixtişaşa yönəltmək istəyən bir qrup təxribatçını Milli Məclisdən çıxararaq Şəhidlər Xiyabanın qarşısını boşaltmağa nail olublar. Mən əminəm ki, dövlətimizin müvafiq orqanları və təhlükəsizlik strukturları ən qısa müddətdə bu ixtişaşları yaradan, insanlarımızın ordumuza olan sevgisini başqa istiqamətə yönəltmək istəyən təxribatçıları müəyyən edəcək, onlarla bağlı qanun çərçivəsində addımlar atılacaq. Hər bir Azərbaycan vətəndaşı kimliyindən, yaşından, vəzifəsindən asılı olmayaraq bu çətin və şərəfli dönəmdə cənab Prezident İlham Əliyevin ətrafında sıx birləşərək düşmənə qarşı birlikdə mübarizə aparmalıdır. Biz bir olaraq həm daxildə, həm də xaricdə olan düşmənlərimizi məğlub edərək ən qısa müddətdə torpaqlarımızı işğaldan azad edəcəyik".

Aysel Yusifqızı

Telegramda izləyin

instagramda izləyin