"Azərbaycan və Türkiyə qırıcılarının Gəncə uçuşları nəinki Ermənistana bütün dünyaya ünvanlanmış siyasi mesajdır" - DEPUTAT
Bakının azad olunmasının 102-ci ildönümü ilə əlaqədar Gəncə şəhəri üzərində Azərbaycan və Türkiyə Hərbi Hava Qüvvələri aviasiya vasitələrinin nümunəvi uçuşları iki qardaş ölkə arasında strateji müttəfiqliyinin növbəti parlaq təzahürü oldu. Eyni zamanda Azərbaycan və Türkiyə qırıcılarının Gəncə səmasında uçuşlarının müəyyən xarici dairələrin diqqətini cəlb etmək məqsədilə keçirilən təsirli hərbi-siyasi aksiya olması da şəksizdir.
Bakının azad olunması münasibətilə Azərbaycan-Türkiyə müttəfiqliyinin Gəncə mesaji, təbii ki, ilk növbədə Ermənistana ünvanlanıb. Dağlıq Qarabağ münaqişəsi bölgəsində hərbi təxribatlar və diversiya cəhdlərindən əl çəkməyən, Azərbaycanın işğal edilmiş ərazilərindən öz silahlı qüvvələrini çıxarmaq əvəzinə bizi yeni-yeni torpaqlarımızın zəbt edilməsi ilə hədələyən Ermənistan bir daha qarşısında güclü Azərbaycan və güclü Türkiyə qardaşlığının durmasına əmin oldu.
Lakin Azərbaycan və Türkiyə qırıcılarının Gəncə uçuşları Ermənistandan daha çox onun xarici havadarlarına ünvanlanan bir aksiya oldu. Həmin dairələrə bir daha nümayiş etdirildi ki, Azərbaycana qarşı hərbi təcavüzünü davam etdirən və Türkiyəyə qarşı ərazi iddialarla çıxış edən Ermənistanı öz siyasətindən dönməyəcəyi halda acınacaqlı aqibət gözləyir.
Bununla bağlı Sonxeber.az-a danışan deputat Müşfiq Cəfərov bildirib ki, tarixin çətin məqamlarında hər iki xalqın müdrik siyasi xadim nümayəndələri bir-birinə sadiqlik nümayiş etdiriblər. Artıq bütün dünyaya bir daha məlum oldu ki, bu tarixi ifadə sadəcə sözdən ibarət olmayıb. İki dost və qardaş ölkə, bütün sahələr üzrə inkişafı yeni mərhələyə çatdırıb. Qədim tarixə malik Türkiyə-Azərbaycan dostluğu, qardaşlığı, iki ölkə arasında birgə nümayiş olunan birlik bu gün daha yüksək səviyyədə həyata keçirilir. Məlum olduğu kimi, Türkiyə hazırda dünya siyasətində çox fəal və önəmli rol oynayır. Bu ölkənin təsir imkanları getdikcə artır. Azərbaycanın beynəlxalq aləmdəki mövqeləri də gündən-günə möhkəmlənir. Qeyd edim ki, xüsusilə, Bakı-Tbilisi-Ceyhan əsas ixrac neft və Bakı-Tbilisi-Ərzurum qaz kəmərlərinin reallaşmasından sonra ölkəmizin nüfuzu daha da artmışdır. Azərbaycan dünyada iri infrastruktur layihələrinin reallaşdırılmasında böyük təcrübəsi olan dövlət kimi tanınır.
Azərbaycan təkcə regionda deyil, eyni zamanda, dünyada söz sahibidir. İqtisadiyyatın inkişaf tempinə görə Azərbaycanın regionun lider dövləti olması, həm də ölkəmizin dünyada ən islahatçı dövlət adlandırılması əlaqələrimizi daha da genişləndirib. Bu baxımdan Azərbaycan Türkiyə, Türkiyə isə Azərbaycana bağlı dövlətdir. Nüfuzlu beynəlxalq qurumların tədbirlərində də iki qardaş ölkənin nümayəndələri hər zaman bir-birilərinə dəstək verib, mövqelərini müdafiə ediblər. Bütün bunlar bir daha təsdiqləyir ki, Türkiyə-Azərbaycan "bir millət, iki dövlətdir".
Deputat qeyd edib ki, Türkiyə - Azərbaycan əlaqələrinin qırılmaz tellərlə bağlanması türk dünyasının daha çox birləşməsində həlledici rol oynayır. Bu gün dünyanın qarışıq və mürəkkəb bir durumunda türk dünyasının sıx birlik, həmrəylik nümayiş etdirməsi çox vacib və zəruridir: "Artıq beynəlxalq aləmdə bəllidir ki, türk dünyasının daha sıx birliyi, onların gücü yüksək səviyyədə artacaq. Həmçinin dünya dövlətləri bilirki, türk dünyasının birliyinin əsasını Türkiyə və Azərbaycan təşkil edir.
Bildiyimiz kimi Dağlıq Qarabağ münaqişəsinin nizamlanmasında Türkiyə daim Azərbaycanın mövqeyini dəstəkləyib və bu gün də tutduğu yola sadiqdir. Qardaş ölkənin Baş naziri dəfələrlə vurğulayıb ki, Dağlıq Qarabağ mövzusu, işğal altında olan ərazilər, ümumiyyətlə, Ermənistan-Azərbaycan arasındakı problem öz həllini tapmayınca, Türkiyə Böyük Millət Məclisindən Ermənistana qarşı müsbət bir qərarın çıxması mümkün deyildir.Türkiyə-Azərbaycan əlaqələri yüksələn xətt üzrə inkişaf edir. Bu inkişafın qarşısını heç bir qüvvə ala bilməz. Azərbaycan Prezidenti İlham Əliyev də bu barədə qəti fikirini bildirərək demişdir: "Türkiyə - Azərbaycan dostluq, qardaşlıq münasibətləri uğurla inkişaf edir, xalqlarımız bir-biri ilə sıx əməkdaşlıq edir, bütün birgə təşəbbüslərimiz, layihələrimiz uğurla icra edilir".
Bakının azad olunması münasibətilə Azərbaycan və Türkiyə qırıcılarının Gəncə uçuşları, hər iki ölkə müttəfiqliyi nəinki Ermənistana bütün dünyaya ünvanlanmış siyasi mesajdır. Ermənistan tərəfi Dağlıq Qarabağ və işğal olunmuş ətraf rayonları tərk etmək əvəzinə Gəncə şəhəri ilə bağlı təhdidlərinə qarşılıq verilən bu siyasi hərbi mesaj ümid edirəm ki qarşı tərəfi yaxşı düşünməyə vadar edəcək öz xalqı ölkəsinin talehi üçün xeyirli addım atıb torpaqlarımızı boşaldacaq. Əks halda Türkiyə Azərbaycan qırıcıları Ermənistan səmalarına qalxacağına əmin olsunlar".
Aysel Yusifqızı
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş