"Türkiyənin nüfuzlu təşkilata sədr olması və Azərbaycanın uğuru düşmənlərə göz dağıdır"- RƏY

BMT Baş Assambleyasının 75-ci sessiyasının sədri, Türkiyənin nümayəndəsi Volkan Bozkır öz səlahiyyətlərinin icrasına başlayıb. Namizədliyi dünyanın 178 ölkəsi tərəfindən dəstəklənən Türkiyə nümayəndəsinin ilk dəfə sədrlik etdiyi sessiya sentyabrın 22-də koronavirus pandemiyası səbəbindən videokonfrans rejimində açılacaq.

Buna baxmayaraq, Türkiyənin tanınmış diplomatının dünyanın yaşadığı bu çətin və ziddiyyətli dövrdə BMT-nin Baş Assambleyasına rəhbərlik etməyi əlamətdar bir haldır.
Qlobal və regional siyasətdə güclü mövqeyə malik Türkiyənin müasir beynəlxalq düzümün qarşısında duran bir sıra mühüm problemin tənzimlənməsinə müsbət təsir göstərə biləcəyi heç bir şübhə doğurmur.

Qlobal nüvə təhlükəsizliyi, Qərb-Rusiya qarşıdurması, Yaxın Şərqdə sülh prosesinin üzləşdiyi problemlər, İranın nüvə proqramı ətrafındakı mürəkkəb vəziyyəti, Suriya və Liviya böhranları, Avrasiya məkanında mövcud olan dövlətlərarası münaqişələr – bütün bu və digər məsələlərə dair dünya birliyinin ədalətli mövqeyinin ifadə olunmasında Türkiyə nümayəndəsinin sədrliyi ümidverici bir amil kimi çıxış edir.

Mövzu ilə bağlı Sonxeber.az-a beynəlxalq münasibətlər və təhlükəsizlik məsələləri üzrə mütəxəssis, politoloq Nəzakət Məmmədova danışıb: "Müasir dünyada BMT müəyyən qədər rol oynayan təşkilatdır.

Baxmayaraq ki, onun soyuq müharibə illərində nüfuzu və təsir gücü daha böyük idi. Yenə də hər halda müasir beynəlxalq münasibətlər sistemi mövcud olduğu üçün BMT dünyanın ən universal nüfuzlu təşkilatı rolunda çıxış edir.

Onun qəbul etdiyi qərar və qətnamələrin üzv ölkələr üçün həyata keçirilməsi labüddür. Türkiyə Azərbaycanın dostudur. Qardaş ölkə olaraq BMT- nin Təhlükəsizlik Şurasına sədrlik etməsi onun diplomatik uğuru sayılar. 87 ölkənin Türkiyənin xeyrinə səs verməsi onu göstərir ki, Türkiyənin dünyada çox böyük nüfuzu var, diplomatik uğurlar qazanmaq imkanları genişdir. Türkiyə Azərbaycana bəzi məsələlərdə müəyyən qədər rol oynamağa, kömək etməyə də çalışacaq.

Lakin bizim işimiz ikitərəfli münasibətləri əhatə edir. Belə bir dövrdə Təhlükəsizlik Şurası sədrinin qardaş ölkənin olması həlledici dövrdə sözügedən ölkənin qoşunlarının Azərbaycana gəlməsi məsələsi də var. İndi Rusiya ilə Azərbaycan münasibətləri gərgindir, Türkiyə Cənubi Qafqazda nüfuzunu artırmağa çalışır. Belə dövrdə Türkiyənin dünyanın ən nüfuzlu təşkilatına sədr olması sevindirici haldır. Nəzərə alaq ki, Türkiyə Avropa Şurasının Parlament Assambleyasında, BMT, ATƏT də və digər təşkilatlarda da bizə həmişə kömək edib.
Hazırda Türkiyə özünün diplomatiya və hərbi cəhətdən çətin dövrünü yaşayır. Buna baxmayaraq həmçinin Azərbaycanın maraqlarını da müdafiə edir, dəstək verir. Bu dəstəyin BMT- də olması bizim gücümüzə güc qatacaq, Ermənistanı müəyyən qədər çətin durumda, gərginlik altında saxlayacaq.

Türkiyənin nüfuzlu təşkilata sədr olması Türkiyənin və Azərbaycanın uğurudur. Ən azı psixoloji uğurdur və düşmənələrə göz dağıdır".

Şəlalə Babayeva

Telegramda izləyin

instagramda izləyin