Məşhur "National Geographic" səhifəsi Bakının FOTOsunu PAYLAŞDI
Azərbaycanın paytaxtının gözəlliyi bu dəfə də 40 milyon izləyicisi olan məşhur "National Geographic Travel" səhifəsində qeyd olunub.
Sonxeber.az BiG.AZ-a istinadən xəbər verir ki, səhifədə Heydər Əliyev Mərkəzinin Françesko Lastruççi (Francesco Lastrucci) tərəfindən çəkilən fotosu paylaşılaraq bu memarlıq simvolu haqqında məlumat verilib.
Yazıçı-fotoqraf olan Françesko Lastruççinin əsərləri Şimali Amerika, Avropa və Asiyanın böyük jurnallarında dərc olunur: "New York Times", "The Wall Street Journal", "The Independent on Sunday", "CNN", "L'Express", "Monocle", "Vanity Fair", "Smithsonian", "National Geographic", "GEO" (Fransa), "Geographic" (Böyük Britaniya) və s.
Çəkdiyi fotolar, həmçinin, ABŞ, İtaliya, Hollandiya, Böyük Britaniya, Sinqapur, Meksika, Kolumbiya və Hong Kongda sərgilənib.
Qeyd edək ki, gözəlliyi ilə heyran edən Heydər Əliyev Mərkəzinin memarlıq layihəsini çoxları ilk dəfə görəndə onun yalnız möcüzə nəticəsində gerçəkləşə biləcəyini düşünürdü. Bu qeyri-adi, mürəkkəb quruluşlu binanın inşası hətta nəzəri cəhətdən reallıqdan uzaq sayılırdı.
Mərkəzin 2007-ci ildə inşasına başlanılmış binası 2012-ci il mayın 10-da, ümummilli lider Heydər Əliyevin anadan olmasının 89-cu ildönümündə istifadəyə verilib. Dünya memarlığının incilərindən sayılan Heydər Əliyev Mərkəzinin binası müasir Bakının rəmzlərindən biri hesab olunur. Binanın layihəsinin müəllifi dünya şöhrətli memar, Pritzker memarlıq mükafatının sahibi Zaha Hadiddir. O, dünyanın bir sıra tikinti komplekslərinin arxitektur müəllifi kimi tanınır.
Mərkəzin binasının layihəsində düz xətlərdən istifadə olunmayıb.
Binanın quruluşu - yerdən dalğavari şəkildə səmaya doğru yüksəlməsi, sonra isə süzülərək yenidən yerə qovuşması təkcə memarlığın postmodern tərzini deyil, eyni zamanda davamlılığı, sonsuzluğu təcəssüm etdirir.
Binanın üzərindəki xətlər həm də keçmişlə gələcəyin bir-birinə bağlılığını yaradır.
Mərkəzin binasının daxili və xarici dizaynı arasında həmahənglik və qarşılıqlı əlaqə bu məkanı daxilən də hamıya yaxınlaşdırır. Çünki Mərkəz yaşından, irqindən, dinindən, cinsindən asılı olmayaraq hər kəsi öz ideyaları ətrafında birləşdirməyi qarşıya məqsəd qoyub.
Binanın inşası zamanı ümumi uzunluğu 90 km təşkil edən dəmir konstruksiyalardan şəbəkə qurulmuşdur. Sahəsi 40 000 m² olan dam örtüyündə hər biri fərqli ölçüdə və müxtəlif həndəsi fiqur- üçbucaq, düzbucaq, trapesiya, paraleloqram şəklində xüsusi tərkibli 12 027 ədəd paneldən istifadə olunmuşdur.
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş