Xalq torpaqlarımızın geri qaytarılması üçün TARİXİ ŞANSIN yarandığını bilir- RƏY
Xəbər verdiyimiz kimi bu gün erməni vandalları yenidən Gəncəni raket atəşinə tutublar. Nəticədə ölən və 50-yə yaxın yaralanan azərbaycanlı vətəndaşlar var.
Azərbaycanın ikinci böyük şəhəri və yarım milyona yaxın əhalisi olan Gəncə şəhərinin yenidən raket atəşinə tutulması vətəndaşlarımızın mübarizə ruhunu, qələbə əzmini sındıra bilmədi, əksinə, onu daha da yüksəltdi. Ölkə prezidentinin xalqa müraciəti zamanı Füzuli şəhəri və kəndlərin işğaldan azad olunması xəbərini verməsi isə insanların bu əzmini daha da möhkəmləndirdi.
Mövzu ilə bağlı Sonxeber.az-a politoloq Nəzakət Məmmədova danışıb:
"Prezidentin xalqa 17 oktyabr günü səslənişi elə bir dövrdə baş verdi ki, xalq olaraq bir gözümüz ağlayır, bir gözümüz gülürdü. Gəncənin raket atəşinə tutulması artıq neçənci dəfədir ki, təkrar olunur. Halbuki, bu raketlər dünyada qadağan olunmuş kütləvi qırğın silahlarına aiddir.
ABŞ bütün dünyada onun ləğvinə çalışır. Belə dəhşətli silah növlərinin dinc əhalimizə qarşı istifadəsi beynəlxalq cinayətdir.
Bununla bağlı, BMT, ATƏT, Avropa Şurası, ABŞ Konqresi, KTMT, Beynəlxalq Cinayət məhkəməsinə və s. müraciətlər ünvanlanmalıdır.
Bu hadisələrə hazırda ən düzgün siyasi qiyməti ölkə başçısı verdi. Füzuli rayonunun işğaldan azad olunması xəbəri yaramıza az da olsa, məlhəm oldu.
17 oktyabr Azərbaycan tarixində həm matəm, həm qələbə günü kimi yazıldı. Prezident mövqeyimizdən geri çəkilməyəcəyimizi bir daha bəyan etdi. Azərbaycan xalqı da bu yolda ölkə başçısının yanındadır.
Bütün təzyiqlərə, təhdidlərə baxmayaraq Prezident Azərbaycanın haqlı mövqeyini böyük əzmlə müdafiə edir, bir addım da geri çəkilmək fikrində deyil. Bunu o, bugünkü çıxışında da qeyd etdi.
Azərbaycan xalqı yaxşı başa düşür ki, bu, bizim ölüm-qalım savaşıdır, tarixi şans yaranıb ki, torpaqlarımızı işğaldan azad edək, bu problemi gələcək nəsillərə ötürməyək, əks halda hələ dünyaya gəlməmiş Azərbaycan uşaqları, doğulacaq hər bir körpə gələcəkdə şəhid olmaq təhlükəsində olacaqdır. Ona görə də xalqımız bütün gücünü toplayıb Ali Baş komandanın yanında yer alıb.
Xalq qələbəyə inanır. Hər gün İlham Əliyevdən yeni-yeni kəndlərimizin azad olunması xəbərini gözləyir, onun hər atdığı "tvit", hər çıxışı yeni ümidlər yaradır, hamı bir-birinə gözaydınlığı verir. Azərbaycan dilində qaçqın, məcburi köçkün, işğal olunmuş torpaqlarımız kimi ağrılı kəlmələr artıq tarixə qovuşmaq üzrədir.
Bu, çox gözəl tarixi şansdır, inanıram ki, bu proses xalqımız üçün gözəl bir şəkildə, uğurla başa çatdıracaqdır".
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş