"Hazırda televiziyalarımız peşəkarlıqlarını artırmalıdır"-Qulu Məhərrəmli

"Son illərdir ki, televiziyalarımız daha çox qapalı şəraitdə çalışıb və çox da təşəbüskar olamayıb".

Bunu Sonxeber.az-a danışan media eksperti, professor Qulu Məhərrəmli bildirib.

Qulu Məhərrəmli qeyd edib ki, müharibə başlyandan televiziyalar çalışır ki, yerli müxbirlərin gücündən istifadə etsinlər və Müdafiə Nazirliyinin məlumatlarını operativ şəkildə insanlarımıza çatdırsınlar:

"Buna da bir çox hallarda nail olurlar. Amma elliklə televiziyaları qınamağın tərəfində deyiləm. Çünki onlar da artıq buzu sındırıb hərəkət etməyə çalışır. Təəssüf ki, Gəncə hadislərində televiziyalarımız passivlik etdilər. Amma İTV Gəncə hadisələrini Türkiyə televizyalarından bir az tez işıqlandırdı. Hesab edirəm ki, bütövlükdə televizyalarımızda çevik mexanizm olmalıdır ki, hadisə yerində olan müxbirlər oradan operativ şəkildə canlı efirə çıxa bilsinlər".

Qulu Məhərrəmli vurğulayıb ki, döyüşlər gedən bölgələrdə xüsusilə büdcədən maliyyələşən televiziyaların müvəqqəti müxbir postları olmalıdır:

"Əlavə reportyorlar qoşulmalı və texniki baxımından təchizatları yüksək olmalıdır ki, operativ şəkildə məlumatları verə bilsinlər. Bunu edə bilsələr mənə elə gəlir ki, televiziyalarımız çox da tənqidə tuş gəlməzlər. Nəzərə almaq lazımdır ki, ölkənin gündəmi nədir. Bu gün gündəmdə olan Qarabağ müharibəsi və koronavirusdur. Döyüş gedən yerlərdən məlumatların verilməsi və şaiyələrin qarşısının alınması çox önəmlidir. Bizim televiziyalarımız bu məsələdə əsas rol oynamalıdır. İnternetin olmadığı bir vaxtda televiziyaların işi ön plana keçir. Ona görə də bunu nəzərə alaraq televiziyalarımız peşəkarlıqlarını artırmalıdır".

Aysel Yusifqızı

Telegramda izləyin

instagramda izləyin