Cavid Osmanov: "Ermənilər təkcə azərbaycanlılara qarşı deyil, digər xalqlara qarşı da etnik təmizləmə aparıblar"

Ermənistanda ən böyük icma olan azərbaycanlılar həmin ərazidən qovulub. Azərbaycanlıların bütün tarixi, dini abidələri dağıdılıb, Azərbaycan mədəniyyətinin izləri silinib. Ermənilər azərbaycanlılara qarşı etnik təmizləmə həyata keçiriblər.

Bununla bağlı Sonxeber.az-a danışan deputat Cavid Osmanov bildirib ki, Ermənistan 30 ilə yaxın işğal altında saxladığı torpaqlarımızda təkcə xalqımıza qarşı etnik təmizləmə aparmayıb, həm də tarixi abidələrimizi dağıdaraq həqiqətləri saxtalaşdırmağa çalışıblar:

"Ermənilər işğal olunmuş rayonlarda silah qaçaqmalçılığı, narkotiklərin becərilməsi və tranziti, çirkin pulların yuyulması, təbii ehtiyatlarımızdan vəhşi kimi istifadə edərək yerli məhsul kimi dünya bazarına çıxarılması kimi vandalizmlə məşğul olublar. Bu bir daha göstərir ki, onlar 30 ilə yaxın işğal altında olan torpaqlarımızdan boş zona kimi istifadə ediblər. Bununla yanaşı, ermənilər təkcə azərbaycanlılara qarşı deyil, digər xalqlara qarşı da etnik təmizləmə apararaq həm Ermənistan, həm də Dağlıq Qarabağ ərazisindən vəhşicəsinə çıxarmasına nail olublar. Məhz ona görə də bu gün Ermənistanda yaşayan əhalinin 99 faizi ermənilərdir. Bu, bir daha onu göstərir ki, burada digər xalqlara qarşı aparılan siyasətdə əsas məqsəd "Böyük Ermənistan" dövlətini yaratmaq olub. Amma bu gün bu mif dağıdılıb. Elə təmas xətti və status-kvo ilə bağlı yaradılan mif kimi. Bu gün Azərbaycanın rəşadətli ordusu Ali Baş Komandanın rəhbərliyi ilə 30 ildə bərpa edilməyən hüquqularımızı təmin edərək, işğalçıları ərazilərimizdən təmizləmə əməliyyatını uğurla davam edir. Düşmən ağır zərbələr vurularaq darmadağın edilir. Sentyabrın 27-dən bu günə kimi düşmənin xeyli sayda canlı qüvvəsi, hərbi texnikası və silah-sürsatı məhv edilir. Əminəm ki, Ali Baş Komandanın rəhbərliyi ilə ordumuz tezliklə 30 il həsrətində olduğumuz bütün torpaqlarımıza bizi qovuşduracaq və üçrəngli bayrağımızı həmin torpaqlarda dalğalandıracaq".

Telegramda izləyin

instagramda izləyin