"Ermənistan cəbhədə ordumuzla döyüşə bilmir, bunun acığını mülki əhalidən çıxır"

Ermənistan azad edilmiş əraziləri yenidən geri götürmək istəyir, Azərbaycanın dinc əhalisinə qarşı hərbi cinayətlər törədir, şəhərləri balistik raketlərlə atəşə tutur.

Bununla bağlı Sonxeber.az-a danışan deputat Ceyhun Məmmədov bildirib ki, Azərbaycan ordusu Ali Baş Komandanın rəhbərliyi ilə davamlı olaraq torpaqlarımızı işğaldan azad edir:

"Bir neçə şəhər və kənd işğaldan azad olunub. Ermənistan açıq şəkildə məğlub vəziyyətdədir, Azərbaycan ordusunun qarşısında acizdir. Cəbhə bölgəsində ordumuzla döyüşə bilmir. Bunun acığını mülki əhalidən çıxır. Bilirsiniz ki, Qəbələ, Kürdəmir, Gəncə, Goranboy və digər rayonlarda dinc əhaliyə qarşı qadağan olunmuş ballistik raketlər atılır. Bununla yanaşı, zaman-zaman mediada da yanlış məlumatlar yayılır. Ermənistan mətbuatına gedən məlumatların hamısı yaladır, sadəcə Ermənistan ictimaiyyətinin sakitləşdirilməsinə yönəlib. Ermənistan rəhbərliyi beynəlxalq təşkilatlara da yanlış məlumatlar verir. Özləri mülki əhaliyə qarşı cinayət törədib, Azərbaycanı günahlandırırlar. Eyni zamanda Ermənistan yalan məlumat yayıb ki, guya Azərbaycan Xankəndini və ətraf kəndləri bombalayır. Bütün bunlar ermənilərin təxribatlara davam etməsini göstərir. Bu ölkə cəbhədəki məğlubiyyətini yalanlarla örtməyə çalışır.

Bütün bunlara baxmayaraq, Azərbaycanın güclü ordusu var. Xalqımız Ali Baş Komandanımıza və ordumuza inanır. Ona görə də belə şeylər Azərbaycan xalqına təsir edə bilməz. Onlar bu yollarla insanlarda çaşqınlıq yaratmağa çalışırlar. Amma bu, mümkün deyil. Çünki bu gün Azərbaycan xalqının tək məqsədi işğal altında olan bütün torpaqlarımızın azad olunmasıdır. Vətəndaşlarımız da çox diqqətli olmalıdırlar. Yalnız Müdafiə Nazirliyinin videolarını paylaşsınlar. Rəsmi olmayan şəkil və videoları yaymasınlar".

Aysel Yusifqızı

Telegramda izləyin

instagramda izləyin