"Ermənistana güzəşt etmək Azərbaycana növbəti minanın qoyulması deməkdir" - Politoloq

"Ermənistanın siyasi rəhbərliyi ilə mümkün danışıqlar prosesinin keçirilməməsi əsasən Baş nazir Nikol Paşinyanın sərgilədiyi qeyri-konstruktiv mövqeyə əsaslanır. Hərbi əməliyyatların intensiv şəkildə davam etməsi fonunda bu kimi danışıqlar kecirilərək, heç bir şərt qəbul olmadan atəşkəsin əldə edilməsi Ermənistanın maraqlarına uyğundur. Məhz bu kontekstdə Prezident İlham Əliyev Paşinyanla görüşə ehtiyac olmadığını və belə bir danışıqların mənasız olduğunu qeyd edib".

Bu sözləri politoloq Məhəmməd Əsədullazadə Sonxeber.az-a açıqlamasında deyib.

Onun sözlərinə görə, əgər, belə bir danışıqlar baş tutarsa, Paşinyanın yenə də əvvəlki mövqeyini davam etdirəcəyi istisna deyil:

"Hazırda Azərbaycan və Ermənistan arasında Qarabağ məsələsində siyasi həll variantı mümkün deyil. Ermənistan XİN rəhbəri Z. Mnatsakanyan da Qarabağın Azərbaycanın tərkibində olmayacağını vurğulamaqla bütövlükdə Bakı üçün Yerevanla hər hansı bir diplomatik danışıqlar təmasını mümkünsüz edir.

Qeyd edək ki, ATƏT-in Minsk qrupunun həmsədrləri bu prosesdə yalnız Azərbaycana qarşı mövqe ortaya qoyaraq atəşkəsə çağırır. Halbuki həmsədrlər ilk növbədə işğalçı ölkəyə çağırış edib, ordusunun işğal olunan ərazilərdən çıxarılmasına çalışmalıdırlar.

Humanitar atəşkəslə bağlı Moskva və Vaşinqtonda keçirilən görüş məhz Azərbaycana təzyiq vasitəsi idi. Aparılan bu danışıqlar birbaşa Azərbaycanın əleyhinə işləyirdi. Minsk qrupunun həmsədrləri növbəti həll variantları hazırlayaraq Qarabağa bir daha "aralıq status" təklifini irəli sürməklə, tərəfləri bir araya gətirməyi planlayırlar.

Bu istiqamətdə çalışırlar və baza prinsiplərindən fərqli həll variantı masaya gətirilməsi gözlənilir. Məqsəd Azərbaycan qoşunlarını Şuşa, Hadrut və Xocavənddən çıxarmaqdır.

Aparılan bütün danışıqların hədəfi Qarabağa Azərbaycanın tərkibində olmayan bir status verməkdir.

Azərbaycan hazırda qələbəyə çox yaxındır. Şuşanın götürülməsi və Laçın yolunun bağlanması ilə Azərbaycanın Ermənistan üzərində, həmçinin Minsk qrupunun üzərində qələbəsi olacaq. Mümkündür ki, Ermənistan tərəfi Azərbaycanın dövlət sərhədlərində provokasiya edərək, gərginliyi davam etdirəcək.

Artıq Minsk qrupu formatı fiaskoya uğrayıb. Ermənistanla bundan sonra Qarabağ danışıqlarının kecirilməsi, hər hansı bir güzəştin edilməsi, Azərbaycana növbəti minanın qoyulması deməkdir. Azərbaycan və Ermənistanla yalnız dövlət sərhədində atəşkəs rejiminin bərpa edilməsi üzrə danışıqlar keçirilə bilər. Məhz bu aspektdə rəsmi Bakı danışıqlara getməlidir.

Ermənistana işğal olunmuş ərazilərdə hər hansı bir güzəşt daxili siyasi müstəvidə yeni problemlərə gətirə bilər.

Məhz buna görə Prezident İlham Əliyev də Ermənistana güzəştə heç vaxt maraqlı olmayacaq.

Türkiyənin regionda olması və burada yeni siyasi nizamın formalaşması, Qarabağda ermənilərə "muxtariyyət" və "aralıq statusunun" verilməsini istisna edir.

Döyüş əməliyyatlarının davam etməsi, siyasi həll variantlarının olmadığını göstərir. Baş verənlər Ermənistanın siyasətinin təzahürüdür. Bundan sonra Rusiya tərəfindən Ermənistana havadan müdafiə, artilleriya və raket sistemlərinin verilməsi dayandırılacaq. Bu silahlar Ermənistana məhz Qarabağ məsələsində hərbi prioriteti saxlamaq üçün verilirdi. Artıq Ermənistan yalnız pul müqabilində belə silahlar ala bilər. O büdcə isə Ermənistanda olmayacaq.

Azərbaycan da daima qeyd edib ki, Ermənistan ərazisinə qarşı hər hansı bir hərbi əməliyyatlarda maraqlı deyil. Ermənistan regionda artıq hərbi balansı pozulmuş, yalnız atıcı silahlarla silahlanmış bir orduya sahib olacaq. Bununla da Ermənistan Azərbaycan və Türkiyə arasında Rusiyanın zəif bir forpostu olaraq mövcudluğunu qorumağa çalışacaq.

Ermənistanın Qərbə inteqrasiyası isə yaxın perspektivdə mümkün görünmür. Qarabağ müharibəsi Rusiya-Ermənistan hərbi müttəfiqliyinə zərbə vuraraq, bu ölkənin gələcək perspektivdə müasir silahlanmasının üstündən xətt çəkdi".

Telegramda izləyin

instagramda izləyin