"Təzyiqlərə cəsarətlə sinə gərən Prezident Azərbaycanın haqlı səsini bütün dünyaya çatdırdı" - DEPUTAT

Bu gün Laçın rayonu işğaldan azad olunub. Növbəti mərhələ Xankəndi, Xocalı və Xocavənddə Azərbaycan bayrağının dalğalanmasıdır.

Bununla bağlı Sonxeber.az-a danışan deputat Cavid Osmanov bildirib ki, bu gün tarixi gündür:

"Azərbaycan tarixi günlərini yaşayır. 44 gün davam edən Vətən müharibəsində rəşadətli ordumuz müzəffər Ali Baş Komandanımızın rəhbərliyi ilə Ermənistanı çox böyük itkilərə uğradaraq geri çəkilməyə məcbur edib və 300-dən çox yaşayış məntəqəsini, strateji yüksəklikləri azad etdikdən sonra 8 noyabr Şuşanı və 70-dən çox yaşayış məntəqəsini işğalçıdan təmizləyib.

Bundan sonra düşmən diz çöküb və ağ bayraq qaldıraraq kapitulyasiyaya razılıq verib. Bununla da 10 noyabrda Azərbaycan-Rusiya prezidentlərinin, eləcə də Ermənistan Baş nazirinin imzası ilə 9 bənddən ibarət bəyanat qəbul edilib. Əlbəttə, bu, ilk növbədə Ermənistanın kapitulyasiyası deməkdir.

Bununla da Azərbaycanın tam ərazi bütövlüyü təmin edildi. Beləliklə, işğal altında saxlanılan 20 faiz torpaqlarımız erməni terrorçularından təmizləndi və Ermənistanın "məğlubedilməz ordu" mifi darmadağın edildi".

Deputat qeyd edib ki, cənab Prezidentimizin rəhbərliyi ilə ordumuz və xalqımız tarix yazdı:

"Bu qələbənin müəllifi Ali Baş Komandan, cənab İlham Əliyevdir. Çünki uzun illərdir ki, ordu quruculuğunda və iqtisadi potensialın güclənməsində, vətəndaşlarımızın bu ruhda yetişməsində onun xüsusi rolu var. Məhz buna görə də döyüş meydanında qəhrəmancasına vuruşan rəşadətli ordumuzun oğulları 44 gün ərzində 300-dən çox yaşayış məntəqəsini azad etdi və erməni ordusunu darmadağın etdi.

Bundan əlavə, diplomatiya və informasiya müharibəsində cənab Prezidentimizin qurduğu düzgün strategiya nəticəsində Azərbaycan qalib gəldi. Diplomatiya və informasiya sahəsində uğurlarımız olmasaydı, biz bu müharibənin davamını gətirə bilməzdik. Bütün təzyiqlərə cəsarətlə sinə gərən cənab Prezident Azərbaycanın haqlı səsini bütün dünyaya çatdırdı.

Bilirsiniz ki, müsahibələr zamanı cənab Prezidentə qərəzli suallar da verilirdi. Amma cənab İlham Əliyev hər birinin cavabını layiqincə verdi və həmin jurnalistlərə Ermənistanda baş verənləri faktlarla misal gətirdi. Xalqımızın bir olaraq liderinin ətrafında birləşməsi və inanması bizim qələbəmizin ideologiyası idi. 50+1 siyasi partiyaların bəyanatla ölkə başçısının ətrafında bifrləşməsi, əlbəttə, xalq-iqtidar birliyinin təməli idi".

Deputat vurğulayıb ki, noyabrın 10-da qəbul olunmuş bəyanata görə, 3 rayon - Ağdam, Kəlbəcər və Laçın - heç bir döyüş getmədən Azərbaycana qaytarılmalı idi:

"Nəhayət ki, Azərbaycan ordusu noyabrın 20-də Ağdama, noyabrın 25-də Kəlbəcərə və artıq dekabrın 1-də də Laçın rayonuna daxil oldu. Bu tarixi zəfər günləri münasibəti ilə Ali Baş Komandan, cənab İlham Əliyevə təşəkkür edirəm. Cənab Prezident əsrlər boyu danışılacaq tarixi günləri bizə yaşatdı. Rəşadətli ordumuza və oğullarımıza təşəkkür edirəm ki, düşməni darmadağın edərək diz çökməyə məcbur etdi. Şəhidlərimizə Allahdan rəhmət, qazilərimizə isə tezliklə sağalıb evlərinə geri dönməyi diləyirik.

Bu gün bütün dünya azərbaycanlılarının sevinməsində onların rolu çox böyükdür. Biz bu tarixi günləri heç bir zaman unutmayacağıq. Şah İsmayıldan, Nadir Şahın qurduğu imperiyadan sonra torpaqlarımız hər zaman işğal olunurdu. Amma müzəffər Ali Baş Komandan uzun illərdir ki, işğal olunmuş torpaqlarımızı azad etməyi bacardı. Bu günlər Azərbaycan tarixinə qızıl hərflərlə yazılacaq. Ərazi bütövlüyümüzün təmin edilməsi qüdrətli Azərbaycanın qurulması üçün vacib amil idi.

Bunu da Ali Baş Komandan Azərbaycan xalqına yaşatdı. Bu gün Laçın Azərbaycana qaytarıldıqdan sonra biz diplomatik mərhələyə qədəm qoyuruq. İnsanlarımızda Xocalı, Xankəndi və Xocavəndlə bağlı müəyyən suallar var. Qeyd edim ki, noyabrın 10-da üçtərəfli bəyanatda ərazi bütövlüyümüz tam təmin edilir. Heç kəsdə şübhə qalmasın ki, Xocalı, Xankəndi və Xocavənd də Azərbaycanındır. Xocalı, Xankəndi və Xocavənddə də Azərbaycanın üçrəngli bayrağı dalğalanacaq, bizim qanunlarımız işləyəcək. 1988-ci ilədək Azərbaycan vətəndaşı olan ermənilər qanunlarımızı qəbul etsələr, burada yaşaya biləcəklər. Əlbəttə, Azərbaycan dünyaya tolerantlıq nümunəsidir. Azərbaycan və erməni icmalarının bir yerdə sülh içində yaşaması təmin ediləcək. Heç kəsdə şübhə olmasın, Azərbaycan öz ərazi bütövlüyünü 10 noyabr bəyanatıyla tam təmin edib. Bir daha xalqımızı və Laçından olan vətəndaşlarımızı təbrik edirəm".

Aysel Yusifqızı

Telegramda izləyin

instagramda izləyin