Qadın nömrəni səhv yığaraq özünə rəfiqə tapdı - FOTO-VİDEO

ABŞ-ın Pensilvaniya ştatının Delaver bölgəsində maraqlı hadisə baş verib. Qadın nömrəni səhv yığmaqla tez bir zamanda yaxın rəfiqəsinə çevrilən qadınla tanış olub.

Sonxeber.az BiG.AZ-a istinadən xəbər verir ki, bu barədə "3 CBS Philly" telekanalının saytında bildirilir.

Belə ki, 2020-ci ildə Anna Forte həyat yoldaşı Elmond ilə danışmaq üçün reabilitasiya mərkəzinə zəng edib. Lakin bir rəqəmi səhv yığdığı üçün dəstəyi tanımadığı qadın qaldırıb. Liza Parks adlı həmin qadın o an yaşadığı hisslər barədə bunları deyib:

"O, nömrəni səhv yığmışdı, səsi əsirdi. Çox kədərli idi və kiminsə səsini eşitməyə şad olduğunu demişdi".

Səhv düşdüyünü öyrəndikdə Forte üzr istəyərək dəstəyi qoyub. Lakin Parks həmin zəngi ağlından çıxara bilmədiyi üçün qadına geri zəng edib.

Elə o zamandan qadınlar ünsiyyəti davam etdirərək ən yaxın rəfiqələrə çevriliblər.

Onların tanışlığından artıq bir il keçib. Nəhayət, martın 28-də rəfiqələr canlı olaraq görüşüblər.

Həyat yoldaşı rəhmətə gedən Anna hesab edir ki, Liza ilə tanışlıq onun taleyinə yazılan hadisədir:
"O, həmişə məni dinləməyə hazırdır və biz bir-birimizlə danışmağı sevirik".

Telegramda izləyin

instagramda izləyin