Azərbaycanda kommunal xidmətlər şəhid və qazi ailələri üçün pulsuz olur? - AÇIQLAMA

44 gün davam Vətən müharibəsi Azərbaycanın qələbəsi ilə nəticələndi. Bu gün təklif olunan məsələlərdən biri də şəhid və qazi ailələrinin kommunal xidmətdən pulsuz yararlanmasıdır. Müharibədən sonra kommunal xidmətlər şəhid və qazi ailələri üçün pulsuz ola bilərmi?

Bununla bağlı Sonxeber.az-a danışan deputat Müşfiq Cəfərov bildirib ki, bu gün xalq və dövlət olaraq şəhidlərimizə, onların ailələrinə, qazilərimizə borcluyuq:

"Onların sayəsində 44 günlük Vətən müharibəsində möhtəşəm qələbə əldə edərək, ərazi bütövlüyümüzü bərpa etdik. Qarabağımızı azad etdik. Ona görə də bu borcu qaytarmaq üçün biz hamımız əlimizdən gələni etməliyik. Onların qulluğunda durmalyıq. Bu gün hər bir Azərbaycan vətəndaşı şəhid ailələri və qazilər tərəfindən hər hansı müraciət olunanda laqeyd yanaşmamalıdır. Dərhal əlindən gələn köməkliyi etməlidir, istiqamət verməlidir. Təbii ki, dövlətimiz tərəfindən lazım olan bütün addımlar atılır. O ki, qaldı şəhid və qazi ailələrinin kommunal xərclərdən azad edilməsi məsələsinə, bilirsiniz ki, bu gün onlar üçün xüsusi imtiyazlar mövcuddur. Bu gün şəhid ailələri dövlət tərəfindən evlərlə təmin edilir. Qazilərimizin səhhətlərindəki problemlərin aradan qaldırılması üçün dövlətimiz əlindən gələni edir.

Bununla bağlı "YAŞAT" Fondu yaradılıb. "YAŞAT" Fondu şəhid ailələrinin və qazilərimizin problemləri ilə məşğul olur. Əmək və Əhalinin Sosial Müdafiəsi Nazirliyi tərəfindən şəhid ailələrinə birdəfəlik və o cümlədən aylıq ödənişlər edilir. Ancaq düşünürəm ki, kommunal xidmətlərin pulsuz olması da o ailələr üçün dəstəkdir. Ona görə hesab edirəm ki, bu məsələyə baxıla bilər. Təbii ki, bütün bunlar vəsaitlə bağlıdır. Bunun üçün büdcədən müəyyən vəsait ayrılmalıdır. Bilirsiniz ki, bu ilin büdcəsi artıq təsdiqlənib. Amma gələn ilin büdcəsinin qəbulu zamanı bu məsələyə baxıla bilər. Artıq məcburi köçkünlərimiz yaxın zamanlarda öz doğma yurdlarına qayıdacaqlar. Bilirsiniz ki, onlar üçün də müəyyən imtiyazlar var idi. Bu imtiyazlar onlar doğma yurdlarına qayıtdıqdan sonra ləğv ediləcək. Bundan sonra da şəhid və qazi ailələrimiz üçün kommunal xidmətlərin pulsuz olması məsələsinə baxıla bilər".

Aysel Yusifqızı

Telegramda izləyin

instagramda izləyin