Əlilliyə görə pensiya verilməsi sistemində yeni mexanizm olacaq? - AÇIQLAMA
Azərbaycanda son günlər əlilliyin müəyyən olunmasında süründürməçilik halları ilə bağlı narazılıqlar mövcuddur. Hətta Əmək və Əhalinin Sosial Müdafiəsi Nazirliyi tərəfindən sağlamlığı məhdud insanların təqaüdlərinin verilməsi müxtəlif səbəblərdən dayandırılıb. Bu da müəyyən narazılığa səbəb olub.
Bununla bağlı Sonxeber.az-a danışan deputat Azər Badamov bildirib ki, son günlər əlilliyin təyin olunmasında problemlərin yaşaması ilə bağlı sosial şəbəklərdə müəyyən insanlar arasında narazılıqlar artıb:
"Təbii ki, əlilliyin müddəti başa çatmış şəxsin yenidən müayinədən keçməsi və xəstəliyin yenidən dəyərləndirilməsi vacibdir və bu qanuna uyğun prosesdir. Həm də müxtəlif yollarla saxta əlillik almış şəxslərin müəyyənləşdirilməsini və onlara ödənilən pensiayaların dayandırılmasını da zəruri hesab edirəm. Pensiya və müavinətləri sağlamlıqları məhdud, əmək qabiliyyəti olmayan şəxslər almalıdırlar. Sağlam, işə qadir şəxslər isə əmək fəaliyyəti ilə məşğul olmalıdırlar. Çox təəssüf ki, əlilliyinn dəyərləndirilməsində sağlamlığı məhdud müəyyən insanların da pensiyaları dayandırılıb. İnsanlar əlilliyin yenidən dəyərləndirilməsi və pensiya ilə bağlı müraciətlərinin cavablarını aylarla gözləməli olurlar. Hətta sağlamlığı məhdud şəxslərə də pensiyanın təyinində imtina hallarına da rast gəlinir. Düşünürəm ki, sağlamlığı məhdud şəxslərin əlilliyinin operativ və yerində müəyyənləşdirilməsi və pensiya təyin edilməsi üçün yeni mexanizm hazırlanmalıdır.
Əmək qabiliyiiyətini itirmiş, pensiya ilə dolanan şəxs üçün alacağı pensiyanın bir ay olmaması böyük çətinliklər yaradır. Bu şəxslər gündəlik dərman və ərzağını pensiya ilə alırlar. Hətta belə şəxslərin 4-5 ay pensiya almadıqlarını da eşidirik. Bu narahatedici məqamdır. Hesab edirəm ki, müvafiq qurum tez bir zamanda əlilliyin elektron təyinatının yeni bir mexanizmini hazırlayaraq təqdim etməlidir ki, vətəndaş süni maneələrlə qarşılaşmasın və hüququ çatan pensiya təminatı ilə fasiləsiz təmin olunsun".
Aysel Yusifqızı
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş