Azərbaycanda problemli kreditlərin həcmi niyə artır? - AÇIQLAMA

Azərbaycanda bu il aprelin 1-nə vaxtı keçmiş kreditlərin həcmi 918.2 milyon manat təşkil edib. Mərkəzi Bankdan verilən məlumata görə, bu da son bir ayda 0.1 faiz artım deməkdir. Həmçinin, ötən ilin eyni dövrü ilə müqayisədə bu göstərici 33.8, ilin əvvəlindən isə 2.8 faiz artıb.

Bəs görəsən problemli kreditlərin artma səbəbi nədir? Mövzu ilə bağlı Sonxeber.az-ın suallarını bank eksperti Xəyal Məmmədli cavablayıb.
Ekspert bildirib ki, əslində problemli kreditlərin həcmindəki artım çox cüzidir: "Problemli kreditlərin həlli ilə bağlı 2019-cu ildə Prezident İlham Əliyev fərman imzaladı. Həmin ərəfədə Azərbaycanda problemli kreditlərin ümumi kredit portfelində xüsusi çəkisi 11-12 faiz ətrafında idi. Hazırda bu göstərici 6,2 faizdir. Yəni 2019-cu ildən sonar problemli kreditlərin həcmi yarıyadək azalıb".
Ekspert problemli kreditlərlə bağlı bəzi vacib məqamlara da toxundu: "Ötən il pandemiya başlayanda AMB belə bir qərar verdi ki, müştərilərin problemli kreditlərinə güzəşt edilsin və həmin şəxslərə cərimə tətbiq edilməsin. Bu qərar əvvəlcə sentyabr, dekabr və bu ilin aprelinə qədər uzadıldı. Bunun nəticəsində problemli kreditlər görünmədi. Hazırda isə problemli kreditlərin həcmi çox cüzi miqdarda artıb. Bəzi aylarda bu göstərici artır, bəzi aylarda isə azalır. Onsuz da bu kreditlər problem yaranmış hissədir və işlək portfel deyil. Əgər məhkəmə sisemi daha çevik və şəffaf şəkildə işləyərsə problemli kreditlərin həcmində ciddi azalma ola bilər".

Telegramda izləyin

instagramda izləyin