İnfeksion xəstəliklərlə bağlı qanun qəbul EDİLMƏLİDİR - Deputatdan VACİB TƏKLİF
Azərbaycanda koronavirusa yoluxanların və ölənlərin sayındakı azalma dinamikası davam edir. Mayın 4-də koronavirus infeksiyasına 963 yeni yoluxma faktı qeydə alınıb, 2091 nəfər müalicə olunaraq sağalıb və evə buraxılıb. Son sutkada 17 nəfər COVID-19-dan vəfat edib. Azalma dinamikası davam edərsə, bir neçə aya normal həyatımıza qayıda bilərikmi?
Bununla bağlı Sonxeber.az-a danışan deputat Cavanşir Paşazadə bildirib ki, bu gün Azərbaycanda vaksinasiya davam etməkdədir:
"Dərmanların xaricdən gətirilməsi və insanlara vurulmasının özü belə, böyük hünər, maliyyə tələb edir. Təbii ki, bu, cənab Prezidentimizin xalqımıza verdiyi dəyər və apardığı siyasətin nəticəsidir. Bizim bu gün əsas çətinliyimiz bəzi insanların yenə də vətəndaşlarımızda çaşqınlıq yaratmaq üçün səsləndirdikləri fikirlərdir. Onlar səsləndirdikləri yalnış fikirlərə özlərini inandırdıqları kimi, bunu başqalarına da aşılamağa çalışırlar. Nəticədə də həmin insanlara görə yoluxanların və ölənlərin sayı çoxalır. Məhz bu cür halların baş verməməsi üçün də düşünürəm ki, biz infeksion xəstəliklərlə bağlı qanun qəbul etməliyik. Həmin qanunda bütün məsələlər öz əksini tapmalıdır".
Deputat vurğulayıb ki, gələcəkdə bizi hansı infeksion xəstəliklərin gözlədiyini bilmirik:
"Ən önəmlisi isə dünyada olduğu kimi, Azərbaycanda da koronavirus pandemiyasının neçə il davam edəcəyi hələ ki, məlum deyil. Bilirsiniz ki, artıq dünyada koronavirusun başqa bir növü, Hindistan ştammı da yayılmağa başlayıb. Ona görə də düşünürəm ki, koronavirusla bağlı yarana biləcək bütün problemlərə biz hazırlıqlı olmalıyıq. Qəbul edilməsini təklif etdiyim infeksion xəstəliklərlə bağlı qanunda bəzi məsələlərin, eləcə də vaksinasiyanın, insanlar üçün məcburi olması vacibdir. .Ya insanlar vaksinasiya olmalı, ya da izolyasiya olunaraq başqa yerə köçürülməlidirlər. Düzdür, pandemiya dövründə rayonlara gediş-gəliş qadağan edilib, lakin biz xarici ölkələrin təcrübələrindən də görürük ki, hər hansı bir infeksion xəstəliklərin yayıldığı bir bölgə tamamilə qapadılır. Düşünürəm ki, bütün bunlar dövlətimizin və insanların sağlam gələcəyi üçün vacibdir".
Cavanşir Paşazadə qeyd edib ki, koronavirus pandemiyası göstərdi ki, hər an hansısa xəstəliyin sürətlə yayılması mümkündür:
"Gələcəkdə bu kimi infeksion xəstəliklərin yarada biləcəyi fəsadlara hazır olmaq üçün qanun qəbul edilməsi mütləqdir. Təəssüf ki, bu gün bir çox insanlar maskanı cərimə olunmaması üçün taxır. Sağlamlığı pulla ölçmək düzgün deyil. Koronavirusla bağlı maarifləndirmə işləri mütəmadi olaraq davam etməlidir. Düşünürəm ki, 44 günlük Vətən müharibəsində olduğu kimi, koronavirus pandemiyası ilə mübarizədə də ümumxalq birliyi sərgiləməliyik. Bununla biz həm özümüzün, həm də gələcəyimizin sağlamlığını qorumuş olarıq".
Aysel Yusifqızı
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş