Bakıda ərzağın qiyməti bahalaşdı, artım davam edəcəkmi? -AÇIQLAMA

Bu il Bakı şəhərinin ticarət şəbəkəsində satılmış ərzaq məhsulları, içkilər və tütün məmulatlarının dəyəri əvvəlki ilin müvafiq dövrü ilə müqayisədə 10,3 % artaraq 2 mlrd 749,7 mln manata, qeyri-ərzaq məhsullarının dəyəri isə 8 % azalaraq 2 mlrd 617 mln manata bərabər olub. Bəs görəsən ərzağın qiymətində yenidən bahalaşma ola bilərmi?
Mövzu ilə bağlı Sonxeber.az-ın suallarını iqtisadçı ekspert Pərviz Heydərov cavablandırıb. İqtisadçı ərzaq məhsullarının qiymətinin bahalanma səbəblərindən söz açıb: "Son bir il ərzində ölkədə ən çox bahalanma ərzağın qiymətində müşahidə olunub. Pandemiya dövründə əhalinin gəlirlərinin azalması qeyri-ərzaq məhsullarına olan tələbi də azaldıb. Yəni son bir ildə əhalinin ən çox pul xərclədiyi məhsullar ərzaq məhsulları olub. Qeyri-ərzaq məhsullarına olan tələbin azalması isə malların və böyük ticarət şəbəkələrin fəaliyyətinə qoyulan qadağa ilə bağlıdır. Online şəkildə müəyyən ticarət əməliyyatları aparılsa da bu əvvəlki dğvr ilə müqayisə edilə bilməz".
İqtisadçı bildirdi ki, ərzağın qiymətində yenidən bahalanma gözləniləndir: "Ölkədə iqtisadi aktivlik hələlik bərpa olunmayıb. Üstəlik bunun nə qədər davam edəcəyi də bəlli deyil. Ərzağın qiymətinin bahalaşması təkcə Azərbaycanla bağlı məsələ deyil. Qlobal iqtisadiyyatda istehsal səviyyəsi aşağı düşüb, nəticədə ərzaq məhsullarının qiyməti bahalanıb".

Şəbnəm

Telegramda izləyin

instagramda izləyin