"Şuşanı xarabalığa çevirən ermənilər tezliklə dünya səviyyəli gözəl bir şəhəri görəcəklər" - DEPUTAT

"28 illik işğal dövründə Qarabağın incisi olan Şuşanı xarabalığa çevirən erməni vəhşiləri çox yaxın zamanda tarixi-mədəni abidələri bərpa olunmuş, ən yeni texnologiyaların tətbiq olunduğu, yüksək standartlara cavab verən dünya səviyyəli gözəl bir şəhəri görəcəklər".

Bu sözləri Sonxeber.az-a açıqlamasında Nəsib Məhəməliyev deyib.

Deputat qeyd edib ki, Azərbaycan Respublikasının Prezidenti İlham Əliyevin sərəncamı ilə Şuşa şəhəri "Azərbaycanın mədəniyyət mərkəzi" elan olunub:

"Bu gün may ayının 8-i, Şuşanın işğalı günüdür. Prezidentin məhz bu gün sərəncam verməsi rəmzi məna daşıyır. 1992-ci ildən bəri ermənilər hər il xüsusi təmtəraqla, ümumxalq bayram kimi qeyd etdikləri bu gün tarixin arxivinə birdəfəlik atıldı. Müzəffər Ali Baş Komandanın rəhbərliyi ilə qəhrəman Azərbaycan ordusu tarixi ədaləti bərpa etdi. 28 illik işğal dövründə Qarabağın incisi olan Şuşanı xarabalığa çevirən erməni vəhşiləri çox yaxın zamanda tarixi-mədəni abidələri bərpa olunmuş, ən yeni texnologiyaların tətbiq olunduğu, yüksək standartlara cavab verən dünya səviyyəli gözəl bir şəhəri görəcəklər. Hörümçək toru kimi bütün dünyaya səpələnmiş diasporanın vasitəsilə, Pənahəli xanın əsasını qoyduğu şəhəri utanmadan özününküləşdirən ermənilərə və onların himayədarlarına ən gözəl cavab məhz budur. Dünya kimin kim olduğunu əyani şəkildə görəcək".

Deputat vurğulayıb ki, Şuşanın nəinki Azərbaycanın, eləcə də Türk-İslam dünyasının mədəniyyət-turizm paytaxtı olacağı şübhəsizdir:

"Orada yaradılacaq infrastruktur ən müxtəlif mədəni-kütləvi, eyni zamanda siyasi tədbirləri keçirmək imkanı verəcək. Qarabağın hər bir guşəsi xalqımız üçün əzizdir. Ancaq hər birimizin qəlbində özünəməxsus yeri olduğunu nəzərə alan ölkə Başçısı prinsipial olaraq Şuşanın bərpasına xüsusi diqqət göstərir. Şuşanın "mədəniyyət paytaxtı" elan olunması, bunun Azərbaycan xalqı tərəfindən rəğbətlə qarşılanması və ölkə Başçısına edilən minnətdarlıq hissi ən gözəl göstəricidir".

Aysel Yusifqızı

Telegramda izləyin

instagramda izləyin