"Şuşada yeni məscidin tikilməsi İslam dininə ehtiramın nümunəsidir" - DEPUTAT

"Azərbaycanın mədəniyyət paytaxtı Şuşada "Xarıbülbül" musiqi festivalının keçirilməsi tarixi əhəmiyyət kəsb etməklə yanaşı, həm də Qarabağın tarixi simasının bərpası deməkdir".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, 32 ildən sonra keçirilən "Xarıbülbül" musiqi festivalının şəhidlərimizin əziz xatirəsinə həsr olunması böyük əhəmiyyətə malikdir:

"Əslində bu festival 44 günlük Vətən müharibəsində qazanılmış Zəfərin mədəniyyət sahəsində davam etməsi demək idi. Bilirsiniz ki, hər il Şuşada "Xarıbülbül" musiqi festivalının keçirilməsi ilə yanaşı, həm də gələn il şəhərin 270 illik yubileyi qeyd olunacaq. Şuşa şəhəri yenidən bərpa edilir. Bilirsiniz ki, bu şəhərin bərpası, dirçəlişi, onun əvvəlki şöhrətinin və gözəlliyinin qaytarılması üçün dövlətimiz tərəfindən bütün lazım olan addımlar atılmaqdadır. Elə bu yaxınlarda dövlətimizin başçısı tərəfindən Şuşanın Azərbaycanın mədəniyyət paytaxtı elan edilməsi bunu bir daha sübut edir. Şuşada "Xarıbülbül" musiqi festivalının keçirilməsi ölkəmizdə müxtəlif dini konfessiyaların, fərqli mədəniyyətlərə malik xalqların həmrəyliyinin ifadəsi idi".

Deputat vurğulayıb ki, Şuşada yeni məscidin təməlinin qoyulması,Yuxarı Gövhərağa məscidinin bərpası dövlət tərəfindən İslam dininə və multikultural dəyərlərə ehtiramın nümunəsidir:

""Xarıbülbül" musiqi festivalının müqəddəs Ramazan bayramı günlərində keçirilməsi rəmzi məna daşıyırdı. 30 il ərzində Ermənistan əsasən Azərbaycanda müxtəlif dini, etnik icmalar arasında təfriqə yaratmaq, Azərbaycan dövlətçiliyini zəiflətmək, parçalamaq üçün davamlı iş aparıb, bu məqsədlə mərkəzlər, təşkilatlar, KİV-lər qurulub, milyonlarla vəsait xərclənib. Təbii ki, bu təxribatda xaricdəki erməni lobbisi, onların havadarları da kifayət qədər canfəşanlıq edib. 44 gün ərzində torpaqlarımızın işğaldan azad olunması üçün bütün etnik və dini icmaların nümayəndələrinin vahid bayraq altında birləşərək döyüşməsi ermənilərin illərdir milyonlar xərclədiyi bu təbliğatının mənasız olduğunu bütün dünyaya sübut etdi. Eyni zamanda, 44 günlük Vətən müharibəsi Azərbaycanda əsrlərlə mövcud olan tolerant mühitin, multikulturalizm ənənələrinin qorunmasına Prezident İlham Əliyevin hakimiyyəti illərində böyük diqqət ayrılmasının da nə qədər düzgün siyasət olmasını sübut etdi. Bundan əlavə, bilirsiniz ki, ölkəmizdə albanşünaslığa xüsusi diqqət və qayğı var. Prezident İlham Əliyev və birinci xanım Mehriban Əliyevanın Xocavənddə kilsəni ziyarət etməsi, Alban dilinin tədrisi, Qarabağda alban-xristian irsinin bərpası və, bundan əlavə, ölkəmizin müxtəlif yerlərində xristian abidələrinin qorunması və bərpası bu qayğını bir daha sübut edir".

Aysel Yusifqızı

Telegramda izləyin

instagramda izləyin