"Ermənilər anlamalıdırlar ki, təxribatlarının heç bir nəticəsi olmayacaq" - Deputat
Ermənilərin təxribatları davam edir. İllərdir ki, yalan informasiyalarla dünyanı aldatmağa çalışan ermənilərin bu dəfənki uydurması guya Azərbaycan ordusunun Ermənistan ərazisinə daxil olması ilə bağlıdır.
Bu barədə Sonxeber.az-a danışan deputat Nəsib Məhəməliyev bildirib ki, ermənilərin sərhəddə törətdikləri növbəti təxribat Laçın rayonu ərazisində yerləşən Qaragölün Azərbaycan hərbçiləri tərəfindən nəzarətə götürülməsi ilə əlaqədardır:
"Noyabrın 10-da imzalanmış üçtərəfli bəyanatın icrası ilə bağlı iki ölkənin dövlət sərhədlərinin delimitasiya və demarkasiya prosesləri həyata keçirilir. Mövcud olan əsas xəritələr vasitəsilə sərhədlər dəqiqləşdirilir. Nəzərə almaq lazımdır ki, həmin xəritələr SSRİ dönəmində Moskvada Baş Geodeziya və Kartoqrafiya Komitəsi tərəfindən hazırlanıb. Yəni bu xəritələr milli respublikalar tərəfindən deyil, mərkəz tərəfindən təsdiq olunub və tam qüvvədədir. Düşünürəm ki, erməni rəhbərliyi bunu gözəl bilir. Məsələ ondadır ki, işğal nəticəsində yaranmış vəziyyətdən sui-istifadə edən ermənilər sərhəd xətlərini birtətərəfli qaydada Azərbaycan tərəfinə keçirərək qanunsuz məskunlaşma aparıblar. Bu da son 25-27 il ərzində həmin ərazidə yaşayan, 44 günlük müharibədə biabırcasına məğlub olan ermənilər tərəfindən narazılıqla qarşılanıb. Digər tərəfdən, hazırda Ermənistanda növbədənkənar seçki prosesinə start verilib. Erməni cəmiyyətində ciddi parçalanmalar baş verib. Bir-birinə qarşı düşmən mövqedə olan siyasi qüvvələr bir çox məsələlərlə yanaşı, sərhəddə baş verənləri də şişirtməklə reytinq qazanmağa, məğlubiyyət faktorunda qarşı tərəfi günahlandırmağa çalışırlar. Əsassız iddialarla, yalanlarla beynəlxalq təşkilatları, Fransa və bəzi erməni təəssübkeşi olan dövlətləri Azərbaycan əleyhinə səfərbərliyə cəlb etməklə müəyyən divident əldə etmək istəyirlər. Düşünürəm ki, gələcəkdə də belə təxribatlar ola bilər. Uzun illər düşmənçilik etmiş iki xalq arasında belə təxribatların olması təbiidir. Ancaq, ermənilər anlamalıdırlar ki, bütün bunların heç bir nəticəsi olmayacaq. Güclü Azərbaycan Ordusu, Müzəffər Ali Baş Komandanın rəhbərliyi ilə Vətən müharibəsində olduğu kimi, sərhədlərin qorunmasında da öz sözünü deyəcək. Hüquqi sənədlər və beynəlxalq qanunlar Azərbaycanın haqlı olduğunu göstərir. Ölkəsinin rastlaşdığı ciddi problemləri həll etmək iqtidarında olmayan Makron kimi rəhbərlər məsələnin mahiyyətini bilmədən qərəzli bəyanatlar səsləndirməklə, özlərini növbəti dəfə gülünc vəziyyətə salırlar. Regionun problemlərini yalnız regiona aidiyyəti olan dövlətlər həll edə bilər. Kənar müdaxilələr nizamlama prosesini ancaq ləngidə bilər".
Aysel Yusifqızı
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş