İnsanların banklara inamı niyə azalıb? – AÇIQLAMA

Hazırda insanların banklara olan etibarı, inamı azalıb. Əmanətçilər əllərində olan pulları banklara qoymağa ehtiyat edirlər. Banka qoyduqları pulu geri götürə bilməyən əmanətçilər "Bundan sonra çətin banka pul qoyum" deyirlər. Nəyə görə banklara etibar bu qədər azalıb?

Mövzu ilə əlaqədar iqtisadçı-ekspert Eldəniz Əmirov Sonxeber.az-a açıqlama verib:

"Bank sektoruna əhalinin inamının olmaması ilə bağlı yaranmış problemlərin kökündə bir çox səbəblər durur. Bu səbəblərdən birincisi banklarda olan mövcud vəziyyət və istər bankların idarə edilməsində, istər banklar barəsində verilən qərarlarda qeyri-adekvatlığın olması durur.

Digər tərəfdən, bu məsələdə bir müddət əvvəl ardıcıl baş verən devalvasiyalar kifayət qədər rol oynayır. Əvvəllər bir qədər inam var idisə, devalvasiyadan sonra həmin inam da itdi.

İkinci məsələ budur ki, hüquq müstəvisində problemlər yarandığı zaman məhkəmələrdə və s. böyük ehtimallarla məsələlər həmişə bankların xeyirinə formalaşır. Bu da əhalini banklardan uzaq salır.

Həmçinin, hazırkı məqamla bağlı qonşu dövlətlərdə bazarın özünün tənzimlədiyi valyuta məzənnəsi hökm sürür, bizdə isə inzibati yolla təyin edilmiş məzənnə siyasəti həyata keçirilir. Buna görə də qonşu ölkələrdə gedən prosseslər bizdə manata təzyiqi artırır və dollara qarşı tələbatı çoxaldır.

Yayılan məlumatlara görə, günümüzdə dolların satışı ilə bağlı ciddi məhdudiyyətlər tətbiq olunur.

Devalvasiya təhlükəsini hiss edən vətəndaş pulunu banka etibar etməyə qorxur. Biri var ki, bankın bağlanacağından, pulun qaytarılmayacağından qorxub etibar etməsinlər, biri də var ki, bank bağlanmasa belə, qoyduğu pul dəyərdən düşə bilər. Qonşu ölkələrdə baş verən məzənnə ucuzlaşmasına görə insanlar ehtiyat edir.

Düşünürəm ki, bu il devalvasiyanın olacağı gözlənilmir. İnsanlarda inam indeksi yüksəlməyənə qədər əhalinin banklarda əmantlərinin azalması tendesiyasını hiss edəciyik".

Aysel Səmədli

Telegramda izləyin

instagramda izləyin