"Medianın İnkişafı Agentliyinin yaranması bu sahəyə diqqəti daha da artırıb" - Emil Əkbərov
Xəbər verdiyimiz kimi, Medianın İnkişafı Agentliyi (MEDİA) çap mediasına və onlayn media subyektlərinə (veb-saytlara) dəstək layihələri elan edib. Müsabiqələrdən birinə ictimai-siyasi qəzetlər, digərinə isə ictimai-siyasi və idman məzmunlu kütləvi informasiya dərc edən onlayn media subyektləri (veb-saytlar) müraciət edə bilərlər.
Bununla bağlı Sonxeber.az-a açıqlamasında "BİG Media" MMC-nin direktoru Emil Akbarov bildirib ki, son illər Azərbaycanda siyasi, iqtisadi, ictimai və mədəni həyatın bütün sahələrində, eləcə də media sahəsində aparılan islahatlar davam etdirilir:
"Medianın İnkişafı Agentliyinin yaradılması da milli mediamızın inkişafı tarixində yeni keyfiyyət mərhələsinin başlanğıcı sayıla bilər. Eyni zamanda, Medianın İnkişafı Agentliyinin mediamızın inkişafı sahəsində atacağı addımlar milli informasiya resurslarımızın inkişafı və onların fəaliyyətinin təkmilləşdirilməsinə ciddi töhfələr verəcək. Hazırda müxtəlif internet resurslarında formalaşan informasiya subyektləri, onların davranış və fəaliyyəti və bunun informasiya təhlükəsizliyi kontekstində tənzimlənməsi məsələsi də günümüzün tələblərindən biridir. MEDİA-nın yeni rəhbərliyinin media sektorumuzun inkişafı sahəsindəki çağırışları və bu sahədəki iş təcrübəsi deməyə əsas verir ki, Agentlik cənab Prezidentin media qarşısında qoyduğu yeni inkişaf tələblərini əhəmiyyətli səviyyədə icra edə biləcək. Aparılacaq islahatlar medianın dövlət maliyyələşməsini, yeni informasiya-kommunikasiya texnologiyalarının tətbiqini və jurnalistlərin peşəkarlıq səviyyəsini artıracaq. Ən önəmlisi isə media-dövlət-cəmiyyət üçbucağında sağlam əməkdaşlığı, medianın bütün qurumlarında məsuliyyət və etik-peşə davranışlarının daha təkmil hala gətirilməsini, beynəlxalq əlaqələrin qarşılıqlı faydalı platformaya çevrilməsini yüksək səviyyədə təmin edə biləcək".
Emil Əkbərov vurğulayıb ki, bu gün media daha dinamik variantlara keçir:
"Medianın İnkişafı Agentliyinin yaranması və media haqqında qanun layihəsinin hazırlanması məsələsi bu sahəyə olan diqqəti daha da artırıb. Medianın İnkişafı Agentliyinin saytlarla bağlı elan etdiyi müsabiqə saytlar üçün faydalı olmaqla yanaşı, həm də layihə sahəsində yeni mühit yarada biləcək. Çap mediası üçün elan edilən yeni müsabiqə qaydaları qəzetlər arasında da sağlam rəqabət mühiti formalaşdıracaq. Həmçinin, qəzetlərin veb-saytlarına ayrıca maliyyənin ayrılması da yenilikdir. Düşünürəm ki, bu addım gələcəkdə qəzetlərin də bu versiyalara üstünlük verməsinə şərait yaradacaq. Bundan əlavə, düşünürəm ki, müsabiqə çap mediasının onlayn mediaya inteqrasiya etməsinə təkan verəcək. Ümumiyyətlə çap və onlayn media subyektləri üçün elan olunmuş müsabiqə beynəlxalq müstəvidə mediada gedən müasir prosesləri özündə ehtiva etməklə yanaşı, həm də Azərbaycan media subyektlərinin peşəkarlığının artırılmasını, onların simasının müasirləşməsini, beynəlxalq rəqabətdə imkanlarının artırılmasını hədəfləyib".
Aysel Yusifqızı
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş