İşğaldan azad olunmuş ərazilərdə azərbaycanlılarla ermənilərin birgə yaşayışı mümkündürmü?

Ermənistanın destruktiv mövqeyi, Azərbaycana qarşı 30 illik işğalçılıq və təcavüzkarlıq siyasəti bu ölkənin blokada vəziyyətinə düşməsi, iqtisadi-sosial və digər sahələrdə ciddi geriləməsi, regional və transmilli layihələrdən kənarda qalması ilə nəticələndi. İkinci Qarabağ müharibəsindəki acı məğlubiyyətdən sonra isə Ermənistanda iqtisadi-sosial və digər sahələr iflic vəziyyətə düşdü, dövlət idarəçiliyi nəzarətdən çıxdı, daxili qarşıdurma pik həddinə çatdı. Bu gün Ermənistanda yaşananlar onu deməyə əsas verir ki, ölkə vətəndaş müharibəsinin astanasındadır.
Əhalinin gəlirlərinin minimuma enməsi, sosial müavinətlərin və maaşların verilməməsi, iqtisadi göstəricilərin ciddi şəkildə aşağı düşməsi, hərc-mərcliyin son həddə çatması, oğurluq və cinayət hallarının xeyli artması, ordunun darmadağın edilməsi və sairə bu kimi faktlar Vətən müharibəsinin Ermənistana vurduğu acı nəticələrdir. Bütün bu amillər onu göstərir ki, Azərbaycan təkcə öz əzəli torpaqlarını işğaldan azad etməyib, həm də təcavüzkar və işğalçı Ermənistanın dövlət dayaqlarını ciddi şəkildə sarsıdıb.
Azərbaycanın 44 günlük Vətən müharibəsində qazandığı Qələbənin əsasını təkcə müasir silahlarla təchiz olunmuş Ordu təşkil etmir. Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev tərəfindən aparılan müdrik, dəqiq konturlara malik daxili və xarici siyasət Vətən müharibəsində Qələbənin qazanılmasında açar rol oynadı.
Vətən müharibəsindəki Qələbə eyni zamanda beynəlxalq hüquq normalarının tələblərinin yerinə yetirilməsini təmin etdi. Belə ki, Qarabağ münaqişəsi ilə bağlı illər ərzində icra olunmayan qətnamələrin tələblərini Azərbaycan öz ordusu, gücü vasitəsilə təmin etmiş oldu.
Vətən müharibəsindəki Qələbə Ermənistan reallıqlarını da dünyaya çılpaq şəkildə nümayiş etdirmiş oldu. İllər ərzidə "qüdrətli" epiteti ilə təbliğatı aparılan Ermənistan ordusunun əslində mifdən başqa bir şey olmadığı ortaya çıxdı. Görünən o oldu ki, Ermənistan ordusunun əsl "qüdrəti" müharibə zamanı bayraqlarını, tanklarını qoyub qaçmaqda, əsgərlər döyüşdən qaçmasınlar deyə qandalla bağlanmalarında imiş.
Azərbaycan Vətən müharibəsində qazandığı Qələbə ilə dünyaya gücünü nümayiş etdirməklə yanaşı, regionda yeni reallıqlar formalaşdırmış oldu. Belə ki regionda təhlükəsizliyin təmini və yeni iqtisadi əməkdaşlıqların formalaşması üçün geniş şərait yarandı. Əminliklə demək olar ki, hazırki gedişat Ermənistandakı mövcud iqtisadi, sosial və siyasi böhranı daha da dərinləşdirəcək və bu ölkə uzun illər ərzində özünü toparlaya bilməyəcək. Çıxış yolu, əlbəttə ki, revanşist fikirlərdən uzaq durmaqda və Azərbaycanın yaratdığı yeni reallıqlarla hesablaşmaqdadır. Ermənistan başa düşməlidir ki, Azərbaycan kimi güclü, qüdrətli bir dövlətlə başqa dildə danışmaq mümkün deyil. İndi hər şey Ermənistanın davranışından asılıdır - ya bir dövlət kimi dünya xəritəsindən silinmək təhlükəsi ilə üz-üzə qalacaq, ya da Azərbaycanın şərtlərinə əməl edərək regionda yaranmış yeni əməkdaşlıq imkanlarından istifadə etməklə öz gələcəyini quracaq.
Nəhayətdə Ermənistan anlamalıdır ki, mövcud böhrandan çıxmağın və iqtisadi inkşafa nail olmağın yolu Azərbaycana qarşı iddialardan əl çəkməkdən keçir. Ermənistan terror siyasətinə son qoymalı, üçtərəfli razılaşmanın şərtlərini yerinə yetirməli, revanşist fikirlərdən tamamilə imtina etməli, Azərbaycanla əməkdaşlığa maraq göstərməli və ölkəmizin potensialından digər ölkələr kimi yararlanmağa meyillənməlidir.
Müzəffər Ali Baş Komandan cənab İlham Əliyev də dəfələrlə Ermənistana çıxış yolunu göstərib. Mayın 20-də cənab Prezident İlham Əliyevin iştirakı ilə Nizami Gəncəvi Beynəlxalq Mərkəzində "Cənubi Qafqaz: Regional inkişaf və əməkdaşlıq perspektivləri" adlı videoformatda keçirilən müzakirələrdə də Azərbaycanın dövlət başçısı regionda baş verən mühüm məsələlərdən danışmış və bir daha Ermənistana çıxış yolu göstərmişdir: "Bu gün məğlub Ermənistandakı mövcud durum acınacaqlıdır. İkinci Qarabağ müharibəsi regionda vəziyyəti tam dəyişib və bu səbəbdən də Cənubi Qafqaz üçün yeni yanaşmaya, yeni gündəliyə ehtiyac duyulur. İndi tərəflər gələcəyə baxmalıdırlar. Hətta 30 illik işğala, azad olunmuş ərazilərdə genişmiqyaslı dağıntılara və onların məhv etdiklərinə baxmayaraq, Azərbaycan gələcəyə nəzər salmağa, vahid inteqrasiya edilmiş Cənubi Qafqaz regionunun bir hissəsi olaraq öz gələcəyini planlaşdırmağa hazırdır. Ümid edirik ki, vaxt gələcək və biz, sözün əsl mənasında, Cənubi Qafqazda fəal əməkdaşlıqdan və inteqrasiyadan danışacağıq. Biz artıq çox mühüm təkliflərlə və təşəbbüslərlə çıxış etmişik və yeri gəlmişkən, onlar 10 noyabr 2020-ci il tarixli birgə Bəyanatda da əks olunub. Azərbaycan əməkdaşlığa və ümumi gələcəyin planlaşdırılmasına açıqdır. Biz qonşu olduğumuz üçün birgə yaşamanı öyrənməliyik. Düzdür, bu, çətin prosesdir. Amma regionda dayanıqlı inkişafın, sülhün və təhlükəsizliyin təmini üçün reallıqlarla barışmaq ən doğru variantdır".
Fikrimizcə, Cənab Prezidentin bu fikirlərini Ermənistan özü üçün xilas resepti kimi qəbul etməlidir.

Telegramda izləyin

instagramda izləyin