"Şuşa Bəyannaməsi dostluğun, qardaşlığın ən böyük zirvəsi sayılacaq sənəddir" - DEPUTAT

"15 iyun hər il Heydər Əliyevin ikinci dəfə hakimiyyətə gəlişi və ölkəmizin qurtuluşu kimi qeyd olunur. Bu il isə bu bayram bizə ikiqat sevinc gətirdi. Belə ki, 2021-ci il 15 iyun tarixində Şuşada Azərbaycan və Türkiyə arasında mütəffiqlik haqqında Şuşa Bəyannaməsi imzalandı. Bu hadisə post-müharibə dövründə qazandığımız ən böyük uğurlardandır".

Bu sözləri Sonxeber.az-a açıqlama verən deputat Vüqar İskəndərov deyib. O bildirib ki, ölkəmizdə çox önəmli hadisələr baş verir:

"Formula1 oyunlarının, Avropa çempionatının 4 oyununun keçirilməsi, Qarabağda böyük quruculuq işlərinin aparılması və s. Ən önəmlisi isə Ərdoğanın Şuşaya səfəri və Şuşa Bəyannaməsinin imzalanması oldu.

Şuşa Bəyannaməsi Azərbaycan və Türkiyəni bütün sahələrdə birləşdirəcək, dostluğun, qardaşlığın ən böyük zirvəsi sayıla biləcək sənəddir. Biz bu bəyannamə ilə dünyaya bir sıra mesajlar verdik. Bir daha sübut olundu ki, Türkiyə Azərbaycanın, Azərbaycan da Türkiyənin hər zaman bütün məsələlərdə yanındadır. İki ölkə arasında hərbi sanaye kompleksi, hərbi məsləhətləşmələr, digər ölkələrin təhdidi, hücumu olarsa, BMT qanunları çərçivəsində hər iki ölkənin bir-birinin yanında olması, müdafiə etməsi kimi məsələlər müqavilənin əsasını təşkil edir.

Digər məsələ isə Şuşada Türkiyənin konsulluğunun açılmasıdır. Bu, o deməkdir ki, türk hər zaman buradadır, Türkiyənin bir parçası Qarabağda olacaq.

Qardaş Türkiyənin prezidentinin Qurtuluş günü Azərbaycana səfər etməsi, Cənab İlham Əliyevin Ərdoğanı o cür qarşılaması bir daha sübut etdi ki, dünyada bir-birinə bu qədər yaxın olan başqa ölkələr yoxdur".

Aytəkin Cəlali

Telegramda izləyin

instagramda izləyin