"Şuşa Bəyannaməsi Azərbaycan-Türkiyə münasibətlərinin ən uca zirvəyə yüksəlməsi deməkdir" - DEPUTAT
Xəbər veridiyimiz kimi, Türkiyə Prezidenti Rəcəb Tayyib Ərdoğan və Azərbaycan Prezidenti İlham Əliyev Qarabağın ürəyi olan Şuşa şəhərində Azərbaycan-Türkiyə arasında müttəfiqlik haqqında Şuşa Bəyannəməsini imzalayıblar.
Bu barədə deputat Cavid Osmanov Sonxeber.az-a danışıb:
"15 iyun 2021-ci il tarixində iki qardaş ölkə arasında imzalanan Şuşa Bəyannaməsi Azərbaycan-Türkiyə münasibətlərinin ən uca zirvəyə yüksəlməsi və yeni mərhələyə qədəm qoyması deməkdir.
Şuşa Bəyannaməsi müstəqillik, suverenlik, ərazi bütövlüyü, beynəlxalq səviyyədə tanınmış sərhədlərin toxunulmazlığı, dövlətlərin daxili işlərinə qarışmamaq prinsiplərini rəhbər tutan, milli maraq və mənafelərini müdafiə və təmin etməyə yönəlmiş müstəqil xarici siyasəti həyata keçirən hər iki ölkə tərəfindən müttəfiqlik münasibətlərinin qurulmasının siyasi və hüquqi mexanizmlərini müəyyənləşdirmək baxımından mühüm əhəmiyyət kəsb edir.
Bu, tarixi bir sənəddir. Həmin sənəddə milli mənafelər baxımından siyasi, hərbi və təhlükəsizlik sahələrində də əlaqələndirilmiş birgə fəaliyyətin təşviq edilməsi xüsusi yer alır. Şuşa Bəyannaməsi son zamanlar hər iki dövlətin dünya arenasında güclü və qüdrətli dövlətə çevrilməsi və xüsusən də Azərbaycanın Vətən müharibəsində parlaq qələbə qazandıqdan sonra güclü və qüdrətli dövlət olması, müstəqil siyasət yürütməsi, eləcə də qardaş Türkiyənin artıq dünya çapında çox böyük nüfuzlu bir dövlətə çevrilməsinin göstəricisi və bu baxımdan da hər iki ölkənin qardaşlığının zirvəsidir.
Bəyannamədə vacib məqamlardan biri də hər iki qardaş ölkənin hərbi mütəffiqlik etməsidir. Tərəflərdən hər hansı birinin müstəqilliyinə, suverenliyinə, ərazi bütövlüyünə, beynəlxalq səviyyədə tanınmış sərhədlərinin toxunulmazlığına və ya təhlükəsizliyinə qarşı üçüncü dövlət və ya dövlətlər tərəfindən təhdid və ya təcavüz edildiyi təqdirdə, birgə məsləhətləşmələrdən sonra hər iki dövlət hərbi güclərini birləşdirərək, mütəffiqlik nümayiş edib həmin təcavüzlərin qarşısını alacaq. Burada silahlı qüvvələrin daha da müasirləşdirilməsi vacib məqamdır.
Digər tərəfdən, ticari-iqtisadi münasibətlərin, milli iqtisadiyyatın, ixracatın şaxələndirilməsi üzrə səylərin artırılması, "Cənub Qaz Dəhlizi"nin səmərəli şəkildə istifadə olunması və daha da inkişaf etdirilməsinə yönəldirilmiş səylərin əlaqəli şəkildə davam etdirilməsi də vacib məqamlardandır. Ticari-iqtisadi əlaqələrin genişləndirilməsi bu sahələrdə əməkdaşlığın daha da möhkəmlənməsi deməkdir ki, bu da gələcəkdə Azərbaycan və qardaş Türkiyəni birləşdirən Zəngəzur dəhlizinin açılması və bununla da qardaş Türkiyə ilə Azərbaycan arasında quru nəqliyyat yolunun bərpası və bütövlükdə türk dünyasının coğrafi baxımından quru yolla birləşdirilməsini əks etdirir.
Eyni zamanda burada qardaş Türkiyə ilə Azərbaycan diasporları arasında daha sıx əməkdaşlığı və birgə inkişafın həyata keçirilməsi nəzərdə tutulur ki, bu da Azərbaycan və Türkiyə reallıqlarının bütün dünyaya çatdırılmasına səbəb olacaq.
Digər tərəfdən, Azərbaycan və Türkiyə media platformasının imkanları çərçivəsində iki ölkənin birgə fəaliyyətinin daha da genişləndirilməsi burada kommunikasiya, informasiya və ictimai diplomatiya sahəsində də əməkdaşlığın inkişafı deməkdir.
Azərbaycan-Türkiyə münasibətlərinin hazırda özünün ən uca zirvəsinə yüksəlmiş olması bu bəyannamə ilə öz təsdqini tapır".
Aysel Səmədli
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş