Hakimlər vəkilləri hansı hallarda cərimələyə bilər? - AÇIQLAMA

Vəkillər əssasız yerə məhkəmənin uzanmasına səbəb olarlarsa, hakimlər onları cərimələyə bilər. Bəs bu proses necə baş verir?

Məsələ ilə bağlı Sonxeber.az-a açıqlama verən deputat Bəhruz Məmmədov bildirib ki, bu qayda bizdə əvvəl də olub, indi sadəcə cərimə artırılıb:

"Əvvəllər də bizim qanunvericilikdə məhkəmə prosesini ləngitmək məqsədi ilə uydurma dəlillərlə həqiqətə uyğun olmayan etiraz vəsatətlərinin verilməsi hallarına qarşı cərimə tədbirləri nəzərdə tutulub. Elə hazırda qüvvədə olan Mülki Prosessual Məcəllənin 21.5-ci maddəsinə əsasən, tərəf yüz on manatadək cərimə edilə bilər. İndi də məhz bu konseptual yanaşma davam etdirilir. Milli Məclisə təqdim olunan Azərbaycan Respublikasının Mülki Prosessual Məcəlləsində dəyişiklik edilməsi haqqında qanun layihəsi məhkəmənin açıq-aşkar əsassız vəsatət və şikayətlər verən, yaxud işə düzgün və tezliklə baxılmasına və onun həll edilməsinə aşkar surətdə maneçilik törədən tərəfin cərimələnməsi barədə 174.5-ci maddənin əlavə olunmasını nəzərdə tutur. Burada söhbət hakimin vəkili cərimələməsindən yox, əsassız olaraq prosesi ləngidən tərəfi - bu, vəkil də ola bilər, qanuni nümayəndə - cərimələyərək işi ləngitmək cəhdlərinin qarşısını almaqdan gedir. Yəni bu düzəlişin məqsədi məhkəmənin ləngimədən qorumaq, çevik surətdə ədaləti bərqərar edərək mübahisəni tez bir zamanda həll etməkdir".

Aytəkin Cəlali

Telegramda izləyin

instagramda izləyin