"Biz mina xəritələrini terrorçularla dəyişmirik" - Polkovnik
Beynəlxalq Qırmızı Xaç Komitəsinin prezidenti Peter Maurer Rusiyanın "İzverstiya" qəzetinə müsahibəsində deyib ki, Azərbaycan və İrəvan arasında əsirlərin mina xəritələri ilə dəyişdirilməsində vasitəçi ola bilərlər. Bəs mina xəritələrinin əsirlərlə dəyişdirilməsi yenidən baş tuta bilərmi?
Məsələ ilə bağlı Sonxeber.az-a açıqlama verən polkovnik Şair Ramaldanov bildirib ki, biz terrorçular müqabilində xəritə almırıq:
"Bu, düzgün söhbət deyil. Biz güya erməni terrorçuları buraxıb, əvəzində mina xəritələri alırıq. Azərbaycanda hərbi əsir yoxdur. Hərbi əsirlərin hamısı bəyannamə əsasında qaytarılıb. Azərbaycanda olan şəxslər terrorçuluq fəaliyyətinə görə saxlanılan şəxslərdir. Onlarla da istintaq aparılır. İstintaqın nəticəsi olaraq da, əgər onların cinayəti təsdiqlənsə, məsuliyyətə cəlb olunacaqlar. Cinayətləri təsdiqlənməsə, 15 nəfər qaytarıldığı kimi, geri qaytarılacaqlar. Ermənistan mediası yazmışdı ki, güya biz əsirlərin qaytarılması qarşılığında mina xəritələrini almışıq. Biz xəritələri alsaq da, almasaq da, əsirlər Ermənistana təhvil veriləcəkdi. Bəzilərinin isə cinayəti sübut olundu və onlara müəyyən cəzalar verildi. Ona görə də biz mina xəritələrini terrorçularla dəyişmirik.
Ağdamın mina xəritələrinin nə qədər düzgün olub-olmaması haqqında Azərbaycan Respublikası rəsmi xəbər yaymayıb. Hələ xəritələr ekspertizada yoxlanılır. Ağdamın mina xəritələri biz istəyən tələblərə cavab verməsə, bundan sonra artıq onlardan xəritə istəməyəcəyik. Yox, əgər xəritələr real olsa, o zaman, təbii ki, biz bu istiqamətdə danışıqları davam etdirəcəyik. Konvensiyanın tələblərinə uyğun olaraq, onlar özləri bizə xəritələri verməli idilər. Tək xərotə vermək yox, hətta əraziləri minalardan da özləri təmizləməlidirlər".
Aytəkin Cəlali
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş