Zəngəzur dəhlizinin açılmasında hansı dövlətlər maraqlıdır? - AÇIQLAMA

İstiqamət: Azərbaycan Respublikasının dünya birliyinə inteqrasiyası, region ölkələri və
digər dövlətlərlə, beynəlxalq təşkilatlarla əməkdaşlığının inkişaf etdirilməsi;

"Qeyd etmək lazımdır ki, Azərbaycan və Ermənistan arasında imzalanan üçtərəfli bəyanatlar gələcəkdə çoxtərəfli və geniş şaxəli sülhün bağlanılmasına gətirib çıxara bilər. Həm 10 noyabr, həm də 11 yanvar tarixində imzalanan bəyanatlar bölgədə təhlükəsizliyi, sülhü və əməkdaşlığı özündə əks etdirir. Eyni zamanda Ermənistan Azərbaycanın şərtlərini qəbul etsə, bu şərtlərin də sülhü dəstəklədiyini nəzərə alaraq, Ermənistanla Azərbaycan arasında sülh müqaviləsi imzalana bilər".

Bu sözləri Sonxeber.az-a açıqlama verən politoloq İlyas Hüseynov deyib.

O bildirib ki, Ermənistan Azərbaycanın yürütdüyü regional siyasətlə barışmalıdır:

"Ermənistan Azərbaycanla olan sərhədlərini tanımalı və bu sərhədləri qəbul etməlidir. 10 noyabr tarixindən sonra Laçın və Kəlbəcərin işğaldan azad olunması, Azərbaycanın döyüş yolu ilə Vətən müharibəsində Zəngilan və Qubadlının işğaldan azad etməsi yeni reallıqılar formalaşdırıb. Bu reallıqları da Ermənistan və dünyanın digər güclü dövlətləri qəbul edir. Ermənistanda revanşizm ritorikası ilə hakimiyyətə can atan Köçəryan və Sarkisyan cütlüyü seçkilərdə məğlub oldu və Ermənistan xalqı onlara siyasi iqtidarı vermədi. Nikol Paşinyan isə Azərbaycanın onlara təklif etdiyi şərtləri qəbul etməlidir, çünki Ermənistan həm də kapituliyasiya aktına imza atıb. Bu akt isə onu deməyə əsas verir ki, Ermənistan Azərbaycanın yürütdüyü regional siyasətlə barışmalıdır. Bundan başqa çıxış yolu yoxdur".

Politoloq, həmçinin, vuğulayıb ki, sülh müqaviləsi ümumilikdə regionda təhlükəsizliyə və sabitliyə gətirib çıxaracaq:

"Sülh müqaviləsi bölgədəki nəqliyyat-kommunikasiya xətlərinin blokdan açılmasına səbəb olacaq, yeni geosiyasi imkanlar formalaşdıracaq.
Zəngəzur dəhlizinin tez bir zamanda açılması regionda olan bütün dövlətlərin marağındadır. Layihə 3+3 platforması çərçivəsində istifadəyə verilməlidir. Bu, Cənubi Qafqaz dövlətləri, Azərbaycan, Ermənistan, Gürcüstan və böyük dövlətlər olan İran, Rusiya, Türkiyənin siyasi-iqtisadi maraqları çərçivəsindədir. Bu konteksdə Azərbaycan öz uğurlu siyasətini davam etdirir. Həm avtomobil yollarının çəkilişi, həm dəmir yolu xətlərinin istifadəyə verilməsi və ötən gün təməli qoyulan Ələt Azad İqtisadi Zonasının tikintisi bu qəbildən olan layihələr çərçivəsindədir. Azərbaycan Mərkəzi Asiya üzərindən gələn yüklərin Xəzər dənizi vasitəsilə işğaldan azad olunan ərazilərdən keçərək Naxcıvan üzərindən Qərbə nəql olunmasında maraqlıdır və bu istiqamətdə müvafiq addımlar atılır".

Aytəkin Cəlali

Yazı Medianın İnkişafı Agentliyinin maliyyə dəstəyi ilə hazırlanıb.

Telegramda izləyin

instagramda izləyin